Almatyda koronavırýsqa qarsy vaktsına alǵan adamdar sany 800 myńnan asty

ALMATY. QazAqparat - Almaty qalasynda bir táýlikte 11 429 adam koronavırýsqa qarsy vaktsına saldyrdy. Bul týraly qalalyq qoǵamdyq densaýlyq saqtaý basqarmasy málim etti, dep habarlaıdy QazAqparat tilshisi.

«18 tamyz kúni 11 429 almatylyq vaktsına saldyrdy. Koronavırýsqa qarsy vaktsınanyń І komponentin 5 153, II komponentin 6276 adam aldy. Bıylǵy jyldyń 1 aqpany men 18 tamyzy aralyǵynda qalada barlyǵy 828 376 adam vaktsına aldy. Vaktsına saldyrǵandardyń ishinde 109 203 adamnyń jasy 60-tan asqan»,- dep habarlady basqarmadan.

Qalada 160 pýnkt jumys istep tur. 1 028 adamnan turatyn 237 egý brıgadasy bar.

Sonymen qatar, 40 kóshpeli mobıldi brıgada uıymdastyrylǵan.

«Qazir medıtsına uıymdarynda, mektepterde, mádenıet, sport nysandarynda, bazarlar men qalanyń saýda oıyn-saýyq ortalyqtarynda vaktsınatsııa pýnktteri jumys isteıdi» - dep naqtylady densaýlyq saqtaý basqarmasynyń baspasóz qyzmeti.