Almatyda koronavırýsqa qarsy ujymdyq ımmýnıtet 57,3%-ǵa jetti

ALMATY. QazAqparat - Almatyda KVI juqtyrǵandardyń 98%-y (136 863 adam) vaktsınalanbaǵandar. Bul týraly Almaty qalasynyń bas sanıtarlyq dárigeri Jandarbek Bekshın brıfıng barysynda aıtty, dep habarlaıdy QazAqparat tilshisi.

«Ekpeler dertti edáýir tómendetýge kómektesti. KVI-men juqtyrýdyń tómendeýi - vaktsınalanǵan halyq 45%-ǵa jetkende, «qyzyldan» «sary» aımaqqa ótken soń bastaldy», - dedi J. Bekshın.

Ujymdyq ımmýnıtet 50%-ǵa jetken kezde aýrý deńgeıi tómendeı bastady. Búginde Almatyda KVI-ge qarsy ujymdyq ımmýnıtet 57,3%-dy (vaktsınalanǵandardyń 49,2%-y jáne aýyryp jazylǵan adamdardyń 8,1%-y) quraıdy.

Sanıtarlyq-epıdemıologııalyq vedomstvo basshysy epıdemıologııalyq ahýaldyń turaqtanýy ujymdyq ımmýnıtettiń qalyptasýyna baılanysty ekenin atap ótti.

Sol sebepti qalanyń bas sanıtarlyq dárigeri kóbinese ınfektsııanyń qozdyrǵyshy bolyp tabylatyn balalar men jasóspirimderdi koronavırýstan qorǵaý mańyzdy dep sanaıdy. Sondaı-aq 60 jastan asqan adamdarǵa qaýip tóndiretinin eske saldy.

Almatynyń bas sanıtarlyq dárigeri qala turǵyndaryn ekpe saldyrýǵa, al alǵashqy vaktsınalanýdan ótkenderge 6 nemese 9 aıdan keıin revaktsınatsııa jasaýǵa shaqyrdy.