Almatyda koronavırýsqa qarsy gospıtaldiń qurylysy qalaı júrip jatyr
ALMATY. QazAqparat – Almatyda koronavırýs indetin taralmaýyna jol bermeý maqsatynda jańa gospıtaldiń irgetasy qalanyp jatyr. 1 aıǵa jetpeı salynyp bitetin jańa nysannyń qurylysy qalaı júrip jatqany jaıly QazAqparat tilshisi bilip qaıtty.
Aýdany 5850 sharshy metr bolatyn 280 orynǵa arnalǵan gospıtal Alataý aýdanynda salynyp jatyr. Qazir nysannyń irgetasy quıylyp, 1 blogynyń montaj jumystary júrip jatyr.
Qurylys 5 sáýirde bastalyp ketken.
«Biz modýldik bloktardan 280 orynǵa arnalǵan gospıtal qurylysyn bastadyq. Osy ýaqytta ınjenerlik jelilerdiń barlyǵy júrgizilip, aıaqtaldy. Іrgetas quıylǵan. 1 bloktyń qabyrǵalary montajdalyp jatyr», - dedi BI Group Almaty kompanııasynyń dırektory Aıdos Muqataev.
Negizgi qurylys materıaldary - Reseıden. Qazir 5 modýldik blokty Atyraý arqyly temir jolmen ákele jatyr.
«Bir mobıldi blok Almatyda bar bolǵan soń jedel satyp alyp, qurastyrýdamyz. Qalǵan 5 blok Atyraýdan kele jatyr. 25 sáýirde qurylysty aıaqtap, tapsyramyz», - dedi joba jetekshisi Arman Qabylhasov.
Muqataev Aıdostyń aıtýynsha, gospıtaldyń basqa nysandardan aıyrmashylyǵy jeldetý júıesinde bolmaq.
«Ár boks jeldetý júıesimen qamtylady. Aýa tazartylady. Bokstarda teris qysym jasaý arqyly batsıllalardyń dálizderge taralýyna kedergi jasalady. Mundaǵy maqsat - medıtsınalyq personaldy ınfektsııadan qorǵaý», - dedi ol.
Ǵımaratty 10 jyl paıdalanýǵa bolady. Karantın merzimi aıaqtalǵan soń bul nysan ákimdikke beriledi. Ári qaraı ony qaı maqsatta paıdalanýdy jergilikti bılik sheshedi.
Jyldam turǵyzylatyn ǵımarat 9 baldyq jer silkinisine tótep bere alady.
Almatydaǵy gospıtaldiń Nur-Sultan jáne Shymkent qalalaryndaǵylardan aıyrmashylyǵy bar.
«Nur-Sultandaǵy ǵımarat mobıldi emes, turaqty. Ondaǵy bokstar túgel zaýytta quıylady. Obektide tek qurastyrylady. Al Shymkentte bólmelerdi teńiz konteınerlerinen jasaý kózdelip otyr», - dedi A.Muqataev.
Aıta keteıik, jańa gospıtal Alataý aýdanynda boı kóteredi. Sondaı-aq, qalalyq Qoǵamdyq densaýlyq saqtaý basqarmasynyń basshysy Tileýhan Ábildaevqa osy jobany qolǵa alǵan kompanııa ókilderimen birlesip, gospıtalǵa asa qajetti qural-jabdyqtar máselesin de pysyqtaý tapsyryldy.
Eske sala ketsek, qala ákimi merdiger kompanııa ókilderine qolǵa alǵan barlyq jumysty sapaly ári ýaqytynda bitirýdi júktegen edi.
Gospıtal salý týraly sheshimdi koronavırýs ınfektsııasyna qarsy kúres maqsatynda qurylǵan QR Prezıdenti janyndaǵy tótenshe jaǵdaı rejımin qamtamasyz etý týraly Memlekettik komıssııa qabyldaǵan bolatyn.
Epıdemıologııalyq ahýaldy turaqtandyrýǵa yqpal etetin osyndaı nysandar Almaty, Shymkent, Nur-Sultan qalalarynda salynady.
