Almatyda koronavırýs juqtyrǵandarǵa arnalǵan dalalyq gospıtal ashylady
ALMATY. QazAqparat - Almaty ákiminiń orynbasary Erjan Babaqumarov COVID-19 juqtyrǵan azamattardy ornalastyrýǵa arnalǵan QR Qorǵanys mınıstrliginiń mobıldi dalalyq gospıtaliniń ázirligin tekserdi, dep habarlaıdy QazAqparat tilshisi.
«Qazaqstandyq bitimgerlik polki» negizinde qurylǵan dalalyq gospıtal qajettilik týyndaǵan jaǵdaıda COVID-19 dıagnozy rastalǵan azamattardy jatqyzýǵa arnalǵan ınfektsııalyq statsıonar retinde paıdalanylady.
Almaty qalasy ákiminiń orynbasary Erjan Babaqumarov qalalyq Qoǵamdyq densaýlyq saqtaý basqarmasynyń basshylyq ókili Ásel Bısenbaeva jáne Almaty qalasy Taýarlar men qyzmetterdiń sapasy men qaýipsizdigin baqylaý departamenti ókili Erlik Dúısembaev, I.Jekenov atyndaǵy ınfektsııalyq aýrýhananyń bas dárigeri Aıgúl Abdrahmanova, Almaty garnızony jáne dalalyq gospıtal basshylarymen birge atalǵan mekemeniń daıyndyq deńgeıimen jáne patsıentterdi qabyldaý múmkindigimen tanysty.
Bılik ókilderi gospıtal ishindegi ınfektsııalyq baqylaý men qyzmetkerlerdiń eńbek qaýipsizdigin uıymdastyrý máselelerine nazar aýdardy. Gospıtaldiń jumys aımaqtaryn «taza», ınfektsııalanǵan jáne shlıýzdar jumysy dep bólý qarastyryldy. Sonymen birge, gospıtaldi medıtsınalyq mamandarmen qamtý, tamaqtandyrý jáne dezınfektsııalyq jumystardy uıymdastyrý, bıologııalyq, medıtsınalyq jáne turmystyq qatty qaldyqtardy ýtılızatsııalaý máseleleri de qaraldy.
Almaty qalasy ákiminiń orynbasary Erjan Babaqumarov ákimshilik atynan gospıtaldiń jeke quramyn Otan qorǵaýshylar kúnimen quttyqtap, koronavırýs ınfektsııasymen kúreste qosqan úlesteri úshin olarǵa alǵys bildirdi.
