Almatyda koronavırýs juqtyrǵandar sany kún saıyn ósýde– Narıman Tabynbaev
ALMATY. QazAqparat - Almatyda kúnine COVID-19 aýrýymen 80 naýqas aýrýhanaǵa jatqyzylady. Bul týraly qalalyq qoǵamdyq densaýlyq saqtaý departamentiniń bastyǵy Narıman Tabynbaev onlaın brıfıngte aıtty, dep habarlaıdy QazAqparat tilshisi.
«Qaladaǵy epıdemıologııalyq jaǵdaı nasharlap ketti. Biz «qyzyl aımaqta» turmyz jáne koronavırýsqa shaldyqqandar sany kún saıyn 130 adamnan tómen túspeıdi. Sonymen qatar, KVI dıagnozy bar patsıentterdiń sany ósýde, ıaǵnı, kovıdti pnevmonııa. Jalpy, qalanyń densaýlyq saqtaý júıesi COVID-pen kúresýge beıimdelgen»,- deıdi qalanyń bas dárigeri.
Sonymen qatar, ol ınfektsııalyq statsıonarlardyń júktemesi týraly aıtty.
«Infektsııalyq statsıonarlardyń júktemesi turaqty deńgeıde, búgingi kúni 424 tósek-oryn bos emes, bul rette onyń 61%-y bos jáne 5 145 tósek-oryn rezervte tur. Qazirgi ýaqytta, táýligine, orta eseppen 50-80 patsıent emdeýge jatqyzylýda. Bizde jansaqtaý bólimsheleri 50%-ǵa tolyq»,-deıdi ol.
Sonymen qatar, ol KVI juqtyrǵandardyń arasynda basqa da aýrýy bar naýqastar sany aıtarlyqtaı óskendigin jetkizdi. Bul rette ol qala turǵyndarynan úıden sırek shyǵýdy, adamdar kóp jınalatyn oryndarǵa barmaýdy, ózin-ózi emdeýmen aınalyspaýdy jáne bilikti medıtsınalyq kómekke júginý kerektigin aıtty.
