Almatyda koronavırýs juqtyrǵandar sany artyp keledi
ALMATY. QazAqparat – Almatyda epıdemıologııalyq ahýal nasharlap keledi, Bul týraly qala basshysy Baqytjan Saǵyntaev málim etti, dep habarlaıdy QazAqparat tilshisi.
«Almaty «sary» jáne «qyzyl» aımaqtyń ortasynda tur. Epıdemııalogııalyq ahýal nasharlap barady. Táýligine 35–40 jaǵdaıǵa deıin tirkelip jatyr. Tamyz aıynda jansaqtaý bóliminde 59 naýqas boldy. Qyrkúıekte –14, qazanda – 15, qarasha aıynyń 15 kúninde 15 naýqas jansaqtaý bólimine tústi. Jaǵdaı ýshyǵyp barady»,– dedi Baqytjan Saǵyntaev.
Onyń aıtýynsha, koronavırýs egde jastaǵy adamdarǵa úlken qaýip tóndiredi.
«Jansaqtaý bóliminde kimder jatyr? Egde jastaǵy adamdar. Olardyń ortasha jasy 65-67 jas aralyǵynda. Bul indetten kóbine úlken kisiler zardap shegýde. Tikeleı COVID-19-dan emes, sozylmaly aýrýlardyń asqynýyna baılanysty», - dedi ákim.
Ákimniń aıtýynsha, Almatyda COVID-19 naýqastaryna arnalǵan reanımatsııalyq 250 oryn bar, onyń 167-si rezervte.
