Almatyda koronavırýs juqtyrǵandar 1,6 myńnan asyp ketti
ALMATY. QazAqparat– Almatyda koronavırýs ınfektsııasyn juqtyrýǵa qatysty rastalǵan 1 622 jaǵdaı tirkeldi, dep habarlaıdy QazAqparat tilshisi.
«Megapolıste koronavırýs ınfektsııasyn jańadan juqtyrǵan 39 adam anyqtaldy. Keshe 13 jáne búgin 26 jaǵdaı belgili boldy. Barlyǵy provızorlyq gospıtalda jatqan karantındegi adamdar. Buǵan deıin olar vırýs juqtyrǵan naýqastarmen baılanysta bolǵan.Sońǵy kúnderi Covid-19 vırýsyna oń nátıjeler tek karantındegi adamdardan anyqtaldy. Jańa juqtyrý oshaqtary joq»,– dep habarlady qalalyq Qoǵamdyq densaýlyq saqtaý basqarmasynyń baspasóz qyzmeti.
Statsıonarlardaǵy Covid-19 vırýsy bar 33 emdelýshiniń jaı-kúıi – aýyr, 237 adamda – aýyrlyqtyń ortasha dárejesinde jáne qalǵan naýqastarda sımptomsyz jeńil túrde ótýde.
Statsıonarlarda koronavırýs ınfektsııasynan 1 145 adam, provızorlyq gospıtaldarda 404 azamat emdelýde, karantınde – 329 adam jáne úıde oqshaýlanýdaǵy 15 327 turǵyn bar.
Qazirgi ýaqytta Almaty qalasynda ÓJJ apparatymen emdelip jatqandardyń arasynda jaǵdaıy asa aýyr dárejedegi naýqas joq.
Búgingi kúni Almatyda koronavırýs indeti boıynsha jaǵdaı turaqtaldy.
«Almatyda atalǵan vırýstan emdelip jatqan adamdardyń basym kópshiliginde, dálirek aıtqanda naýqastardyń 77%-da bul syrqat jeńil túrde ótip jatqanyn, ıaǵnı halyqaralyq tájirıbege sáıkes olar emdeýdi qajet etpeıtindigin jáne vırýsty tikeleı tasymaldaýshy ekendigin esterińizge salamyz. Bul emdelýshilerge qatysty, eger úıdegi karantınge olarda tıisti jaǵdaılar jasalǵan bolsa, onda olardy úı karantınine jiberý máselesi qaralatyn bolady, eger tıisti jaǵdaı jasalmaǵan bolsa, onda karantındik statsıonarlarda bolady. Mysaly, qazirgi ýaqytta Almatyda aýrýy jeńil túrde júrip jatqan 68 medıtsına qyzmetkeri úı jaǵdaıynda ózin-ózi oqshaýlaý arqyly emdelýin aıaqtaýǵa aýrýhanadan shyǵarylǵan», - dep atap ótti basqarmanyń baspasóz qyzmeti.
Sonymen qatar, sımptomsyz tasymaldaýshylarda koronavırýs ınfektsııasy anyqtalǵan jaǵdaıda, patsıent klınıkalyq tekserýden ótip, 3 kún boıy baqylaýda bolady jáne emdeýge jatqyzylady, sodan keıin ǵana úı karantınine jiberiletindigin eskerý qajet.
Keshe koronavırýs ınfektsııasynan saýyǵyp, 38 adam emdeýden shyǵaryldy.
Megapolıste jalpy vırýs juqtyrǵandar ishinen saýyǵyp shyqqan emdelýshiler sany búgingi kúni 29 paıyz. Al úı karantınine shyǵarylǵandardy esepke alǵanda 33 paıyzǵa jetti.
