Almatyda koronavırýs juqtyrǵan naýqastardyń jaǵdaıy qandaı
ALMATY. QazAqparat – Almaty qalalyq Qoǵamdyq densaýlyqty saqtaý basqarmasynyń baspasóz qyzmeti koronavırýs juqtyrǵan patsıentterdiń jaǵdaıy týraly aıtyp berdi, dep habarlaıdy QazAqparat tilshisi.
Basqarmanyń habarlaýynsha, sońǵy tirkelgen 26-shy patsıent — 45 jastaǵy áıel. 23 naýryzda túngi 01.00-de Mysyrdan Almatyǵa ushyp kelgen.
«Reısten túsisimen jolaýshy birden oqshaýlandy. Dárigerler alǵan taldaýdan ol áıel COVID-19 juqtyrǵany rastaldy», - dedi basqarmanyń baspasóz qyzmetinen.
Al basqarma munyń aldynda aıqyndalǵan 2 patsıent karantın kezinde koronavırýs juqtyrdy degen aqparatty joqqa shyǵardy.
«Olardyń biri munyń aldynda Máskeý-Almaty baǵytynda ushyp kelgen naýqaspen tyǵyz baılanysta bolǵan. Osyǵan baılanysty ol 14 kúnge oqshaýlanǵan bolatyn. Keshe taldaý nátıjesi rastaldy. Ekinshi adam Mınsk-Almaty reısinde kelgen naýqaspen seriktes bolǵan. Bul laınerdiń jolaýshylary da sol kúni oqshaýlanǵan bolatyn. Naýqastardyń barlyǵy karantınnen buryn aýyryp kelgen naýqastarmen baılanysta bolǵandyqtan juqtyrǵan», - dedi basqarmadan.
Jalpy, qalalyq aýrýhanalarda qazir 26 patsıent jatyr.
Olardyń jaǵdaıy birqalypty. Tek ekeýiniń jaǵdaıyn ǵana dárigerler ortasha dep baǵalap otyr.
Al qalanyń provızorlyq emhanalarynda 660 adam jatyr. Olardyń barlyǵy 1 A sanatyndaǵy elden kelgen jolaýshylarmen baılanysta bolǵan. Olar provızorlyq emhanada bir-birinen oqshaýlanǵan. Olarǵa árqaısysyna jeke qyzmet kórsetiledi. Ortaq ashanany paıdalana almaıdy.
Sonymen qatar 778 adam karantınge oqshaýlanǵan.
Úı karantıninde 1472 adam jatyr.
Karantınde jatqan adamdardyń barlyǵynda dene qyzýy joq. Kataraldy belgiler baıqalmaıdy.
