Almatyda koronavırýs juqtyrǵan medıtsına qyzmetkerleri ótemaqy ala ma
ALMATY. QazAqparat – Almatyda jappaı koronavırýs juqtyrǵan medıtsına qyzmetkerleri 2 mln teńge kóleminde ótemaqy ala ma? Bul saýalǵa qalalyq Qoǵamdyq densaýlyq saqtaý basqarmasynyń basshysy jaýap berdi, dep habarlaıdy QazAqparat tilshisi.
«Memlekettik komıssııa shyǵarǵan qaýlyǵa sáıkes, ınfektsııalyq jáne provızorlyq statsıonarlarda jumys isteıtin, vırýsty juqtyrýy múmkin naýqastarmen jumys istegen medıtsına qyzmetkerleri 2 mln teńge mólsherinde ótemaqy alýy tıis. Komıssııa sheshimine sáıkes, óz mindetin atqaryp jatqan mamandardyń barlyǵy ótemaqy alýy kerek dep oılaımyn»,-dedi basqarma basshysy Tileýhan Ábildaev.
Aıta ketý kerek, Almatyda koronavırýs juqtyrǵan medıtsına qyzmetkerleriniń sany 218-ge jetti. Olardyń basym kópshiligi Almaty ortalyq klınıkalyq aýrýhanasynda jumys istegen.
