Almatyda koronavırýs juqtyrǵan ekinshi júkti áıel bosandy
ALMATY. QazAqparat - Almatyda koronavırýs juqtyrǵan júkti áıel aman esen bosandy. Balaǵa vırýs juqpaǵan, dep habarlaıdy QazAqparat tilshisi.
Qalalyq Qoǵamdyq densaýlyq saqtaý basqarmasynyń habarlaýynsha, júktiliktiń 36-aptasynda kelgen kelinshekti №1 aýrýhananyń dárigerleri bosandyrǵan.
«Náresteden koronavırýsqa test alyndy. Ol vırýs joqtyǵyn kórsetti. Qyz bala qazir balalar bóliminde jatyr», - dedi statsıonardyń bas dárigeri Sábıt Pazylov.
Qazir anasy men balasynyń jaǵdaıy turaqty.
Aıta ketý kerek, 15 sáýirde Almatyda taǵy bir koronavırýs juqtyrǵan kelinshek bosanǵan bolatyn. Salmaǵy 3 keli bolyp týǵan ul bala da vırýstan din aman bolyp shyqty.
