Almatyda koronavırýs juqtyrǵan dárigerlermen baılanysta bolǵan 316 adam oqshaýlandy
ALMATY. QazAuparat – Almatyda karantınge jabylǵan Ortalyq qalalyq klınıkalyq aýrýhanada koronavırýs juqtyrǵan dárigerlermen baılanysta bolǵan 316 adam oqshaýlandy. Bul týraly Almaty qalasy Taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaqasymova brıfıng barysynda aıtty, dep habarlaıdy QazAqparat tilshisi.
«Biz jaqyn baılanysta bolǵan 316 adamdy oqshaýladyq. Munyń Almatydaǵy eń úlken klınıka ekenin eskerý kerek. Munda 1000-nan asa qyzmetker bar. 316 adam oqshaýlanyp, baqylaýǵa alyndy», - dedi Aızat Moldaqasymova brıfıng barysynda.
Búginde Almaty boıynsha barlyǵy 27 dárigerdiń vırýs juqtyrǵany anyqtaldy. Osy jaǵdaı boıynsha epıdemıologııalyq tergeý bastaldy.
