Almatyda koronavırýs juqtyrǵan dárigerlerdiń sany 218-ge jetti
ALMATY. QazAqparat – Almaty qalasynda koronavırýs jalpy 218 medıtsına mamanynan anyqtaldy, dep habarlaıdy QazAqparat coronavirus2020.kz-ke silteme jasap.
14 sáýir, saǵat 13.00-den bastap Almaty qalasynda koronavırýs ınfektsııasynyń jańadan 24 oqıǵasy anyqtaldy. 15 sáýir, saǵat 12.30-daǵy sońǵy málimet boıynsha, qalada barlyǵy 370 naýqas tirkelgen. Onyń ishinde 6 bala jáne 3 úsh júkti áıel bar.
Ortalyq qalalyq klınıkalyq aýrýhanasynda jatqan 215 adamnyń barlyǵynan koronavırýske analız alynǵan. 18 patsıentte taldaý oń nátıje kórsetti.
Búginde Almatyda indetti juqtyrǵan medıtsına qyzmetkerleriniń jalpy sany – 218. Olardyń 182-si Ortalyq qalalyq klınıkalyq aýrýhanasynyń mamandary. 30 qyzmetker - Qalalyq balalar klınıkalyq juqpaly aýrýlar aýrýhanasynyń, 2-eýi - shuǵyl medıtsınalyq járdem stantsııasynyń, 1-eýi - № 1 Qalalyq klınıkalyq aýrýhananyń qyzmetkerleri. Sondaı-aq № 11, 32 jáne 12 qalalyq emhanalarynda KVI-ge shaldyqqan bir-bir medıtsına mamanynan anyqtaldy.
Ortalyq qalalyq aýrýhana dezınfektsııalyq óńdeý jumystaryna jabyldy.
Qazirgi ýaqytta qalanyń statsıonarlarynda Almaty oblysynyń bir patsıentin qosa alǵanda, barlyǵy 311 adam em qabyladýda. Jaǵdaılary - qanaǵattanarlyq. Qaıtys bolǵandar sany - 2. Jazylyp shyqqandar sany - 58.
Aıta keteıik, 14 sáýir kúni almatylyq 110 dárigerdiń jappaı koronavırýs juqtyrǵany týraly jazǵan bolatynbyz. Medqyzmetkerler vıdeoúndeý túsirip, mınıstrdiń atalmysh jaǵdaıǵa nazar aýdarýyn ótindi. Keıin Ortalyq qalalyq klınıkalyq aýrýhanany QR DSM QR Taýarlar men qyzmetterdiń sapasy men qaýipsizdigin baqylaý komıteti tóraǵasynyń orynbasary Nurhan Sadýaqasov tekseretini habarlandy.
Osy jaǵdaıdan keıin atalmysh aýrýhananyń bas dárigeri Almas Djývashev qyzmetinen bosatyldy.
Búgin Marat Abdýllaev aýrýhananyń basshysy mindetin atqarýshy bolyp taǵaıyndaldy.
