Almatyda koronavırýs juqtyrǵan bir adamnyń jaǵdaıy ortasha aýyr – ákimdik
ALMATY. QazAqparat – Almatyda koronavırýs juqtyrǵandardyń sany qazir 19-ǵa jetti. Qalalyq qoǵamdyq densaýlyqty saqtaý basqarmasynyń basshysy Tileýhan Ábildaev naýqastardyń densaýlyǵy jaıly aıtty, dep habarlaıdy QazAqparat tilshisi.
«Ózderińizge belgili, búgin 19-shy naýqas tirkeldi. Ol Krasnodar-Máskeý-Almaty reısimen kelgen. Bul el karantın sanatyna kirmegen. Alaıda ol aldynda anyqtalǵan naýqas áıelmen baılanysta bolǵan soń provızorlyq emhanada jatqan bolatyn. Búgin odan alynǵan test oń nátıje berdi. Ol juqpaly aýrýlar aýrýhanasyna jatqyzyldy. Qazir barlyǵy 16 adam qalalyq aýrýhanada jatyr, al balalar aýrýhanasynda - 2 bala, bir balanyń anasy jatyr. 18 adamnyń jaǵdaıy birqalypty, qanaǵattanarlyq. Eshqaısysynda kataraldy qubylys joq», - dedi ol.
Basqarma basshysynyń aıtýynsha, bir adamnyń ókpesinde obstrýktıvti ózgerister bolǵan soń jaǵdaıy ortasha dep baǵalanyp otyr.
«Bul adamnyń ókpesinde burynnan sozylmaly obstrýktıvti ózgerister bar eken. Sozylmaly bronhıt dıagnozy bar. Sol úshin qazir jótel mazalaıdy dep shaǵym aıtady. Biraq jaǵdaıy qazir baqylaýda», - dedi basqarma basshysy.
Onyń aıtýynsha, qazir Almatyda 608 adam provızorlyq emhanada jatyr. 730 adam úı karantınine oqshaýlanǵan.
