Almatyda koronavırýs juqtyrǵan 4 myńǵa jýyq naýqas aýrýhanada jatyr

ALMATY. QazAqparat - Almatyda koronavırýs juqtyrǵan 3 669 naýqas aýrýhanada em qabyldap jatyr. Bul týraly onlaın brıfıng barysynda qalalyq Qoǵamdyq densaýlyq saqtaý basqarmasynyń basshysy Narıman Tabynbaev aıtty, dep habarlaıdy QazAqparat tilshisi.

«Almatyda kornavırýs ınfektsııasyn juqtyrǵandar sany azaıyp keledi. Máselen, 10 kún buryn aýrýhanalarǵa bir táýlikte 700 naýqas jatqyzylsa, qazirgi tańda 378 naýqas túsedi. Emdelip shyqqan naýqastar sany – 454. Úı jaǵdaıynda em qabyldap jatqan adamdardyń sany da 14 200-den 7446-ge kúrt tómendedi. Qazirgi tańda qala statsıonarlarynda 3 669 naýqas emdelýde, 43,1% oryn tolǵan. Reanımatsııa jáne qarqyndy terapııa bóliminde 331 adam jatyr. 52 naýqas jasandy tynys alý apparatyna qosylǵan»,-dedi spıker.

Narıman Tabynbaev ázirge bosańsýǵa erte ekenin aıtty.

«Bir eskertetin jaǵdaı, bosańsýdyń qajeti joq, jaǵdaı aıaqasty qıyndap ketýi múmkin, ásirese qazir oqýshylar men stýdentter offlaın oqýǵa kóshkende, karantın talaptaryn saqtaýdy umytpaıyq»,-dedi ol.