Almatyda koronavırýs juqtyrǵan 22 adamnyń jaǵdaıy aýyr
ALMATY. QazAqparat – Búgin Almatyda COVID-19 vırýsyn juqtyrýdyń jańadan 57 jaǵdaıy tirkeldi. Onyń tórteýi ózdiginen tekserilýge júgingen adamdar, dep habarlaıdy QazAqparat tilshisi.
«Profılaktıkalyq tekserý kezinde indet 14 adamnan anyqtalsa, qalǵandary karantınde bolǵandar. Olarmen jaqyn baılanys jasaǵan barlyq azamat oqshaýlandyryldy. Jalpy, megapolıste pandemııa bastalǵaly beri vırýstyń rastalǵan 1966 jaǵdaıy tirkeldi»,– deıdi Almaty qalasy Qoǵamdyq densaýlyq saqtaý basqarmasynyń basshysy Tileýhan Ábildaev.
Qazirgi ýaqytta qalalyq juqpaly aýrýlar statsıonarynda koronavırýs ınfektsııasynan 864 naýqas em-dom qabyldap jatyr, onyń 30 – bala. Eki naýqastyń jaǵdaıy – óte aýyr, 22 adamda – aýyr, 240 naýqasta aýyrlyqtyń ortasha dárejesi, al qalǵandarynyń densaýlyǵy qanaǵattanarlyq.
Búgingi kúni provızorlyq gospıtalda 196 adam bar, 266 adam karantınde. 13 299 azamat úı karantıninde jatyr.
Keshegi kúni 55 adam qaýipti indetten jazylyp shyqty. Onyń ishinde 28 adam – medıtsına qyzmetkerleri, 1,5 jas pen 16 jasqa deıingi – 10 bala, 68-73 jastaǵy úsh zeınetker jáne qalǵandary orta jastaǵy azamattar.
Jalpy, shaharda pandemııa bastalǵaly beri qaýipti indetten 1092 naýqas saýyǵyp shyqty, bul 56% quraıdy.
«Qalada karantın rejımi áli jalǵasýda. Megapolıs turǵyndaryna, ásirese, jótel, murynnan sý aǵý nemese basqa da aýrý sımptomdary bolǵan jaǵdaıda barlyq qaýipsizdik sharalaryn ustaný kerektigin eskertemiz. Atap aıtqanda, betperde kıip, múmkindiginshe halyq kóp jınalatyn oryndarǵa barmaýǵa, qoldy jıi jýyp, adamdardan kem degende 2 metr qashyqtyqta ustaý kerektigin ótinip suraımyz. Bul usynystardy oryndaı otyryp, siz aýrýdyń taralý qaýpin tómendetesiz. Eger sizde dene qyzýy kóterilip, jótel paıda bolsa, tynys alý qıyndaı tússe, medıtsınalyq kómekke júginip, jedel járdem shaqyrǵanyńyz abzal», – dedi Almaty qalasy Qoǵamdyq densaýlyq saqtaý basqarmasynyń basshysy Tileýhan Ábildaev.
