Almatyda koronavırýs juqtyrǵan 2 jasar qyzdyń jaǵdaıy ortasha aýyr – dárigerler
ALMATY. QazAqparat – Almaty dárigerleri koronavırýs juqtyrǵan balalardyń jaǵdaıyn naqtylady, dep habarlaıdy QazAqparat tilshisi.
Qalalyq qoǵamdyq densaýlyqty saqtaý basqarmasynyń habarlaýynsha, qazir eki adamnyń jaǵdaıyn dárigerler ortasha aýyr dep baǵalap otyr.
«Munyń aldynda aıtqan orta jastaǵy er adamnyń jaǵdaıy áli de ortasha. Onyń buǵan deıin de ókpesinde sozylmaly obstýrktıvti bronhıt keseli bolǵan. Al 2018 jyly týǵan qyz balada jótel bar. Jaǵdaıy ortasha aýyr dep baǵalanyp otyr. Jalpy basqa naýqastardyń densaýlyǵynda jaqsarý bar. Olardyń dene qyzýy túsken», - dep málim etti basqarmanyń baspasóz qyzmetinen.
Aıta ketý kerek, qazir Almatyda koronavırýs juqtyrǵan 22 patsıent em qabyldap jatyr. Onyń bireýiniń jaǵdaıy ókpesinde sozylmaly ózgeris bolǵandyqtan aýyrlaǵanyn habarlaǵan bolatynbyz.
