Almatyda koronavırýs juqtyrǵan 18 naýqas Frankfýrt qalasynan kelgen
ALMATY. QazAqparat – Mamandar Almatydaǵy epıdemıologııalyq jaǵdaı týraly aıtty, dep habarlaıdy QazAqparat tilshisi.
Búgin, ıaǵnı 18 naýryzda saǵat 19.00-de COVID-2019 juqpasyn juqtyrǵan taǵy bir áıel anyqtaldy. 37 jastaǵy áıel Frankfýrt - Nur-Sultan - Almaty baǵyty boıynsha 16 naýryzda ushyp kelgen.
«Dert juqtyrǵan áıel 14 kúndik úı karantınine alyndy, óıtkeni Germanııa «1b» sanatyna jatady. Áıel 18 naýryzda dene temperatýrasynyń 37 gradýsqa deıin kóterilip, tamaǵynyń aýrýynan ózin jaısyz sezinip, jedel járdem shaqyrǵan jáne qalalyq klınıkalyq ınfektsııalyq aýrýhanaǵa jetkizilgen. Qazir onyń jaǵdaıy qanaǵattanarlyq. Almaty qalasy aýmaǵynda áıelmen baılanysta bolǵan adamdar oqshaýlandy. Qazirgi kezde Almatynyń ınfektsııalyq aýrýhanasynda 15 patsıent bar. Al balalardyń ınfektsııalyq aýrýhanasynda 2 bala men sondaǵy bir balanyń anasy em alyp jatyr. Olardyń barlyǵy bekitilgen hattamaǵa sáıkes emdelýde, vırýsqa qarsy jáne sımptomatııalyq terapııa ýaqtyly júrgizilýde. Barlyq patsıentterdiń jaǵdaılary qanaǵattanarlyq ekeni habarlandy.
Koronavırýs ınfektsııasynyń taralýyna jol bermeý úshin myna nusqaýlardy múltiksiz oryndaý qajet:
- qoldy jıi jýyp, antıseptıkterdi qoldanǵan jón. Qoldy sabynmen árbir jarty saǵat boıyna 20 sekýnd boıy jýý kerek. Eger jaqyn mańda qol jýatyn oryn, sabyn bolmasa, onda mıkrobtardy kádimgi antıseptıkpen joıýǵa bolady;
- bólmeni jıi jeldetý qajet;
- qoǵamdyq oryndardan aýlaq bolǵan jón;
- qol alysýǵa jáne basqa da jaqyn baılanys jasaýǵa bolmaıdy;
- ımmýnıtetti kúsheıtý qajet;
- sýyq tııý jáne tumaý aýrýlarynyń belgileri (sımptomdary) baıqalsa, ózin jaısyz sezinse, qurǵaq jótel bolsa, onda birden emhanadan dárigerdi nemese jedel járdemdi shaqyrý qajet ári maska kıgen jón.
Anyqtama úshin 1406 nómiri boıynsha Call- ortalyq táýlik boıyna jumys isteıdi.
Resmı aqparatty áleýmettik jelidegi Almaty qalasy ákimdiginiń saıty men resmı paraqshalardan alýǵa bolady. Qosymsha aqparat Telegram-kanaldaǵy Stopcov Almaty jedel jarııalanady.
