Almatyda koronavırýs juqtyrǵan 13 adamnyń jaǵdaıy óte aýyr

ALMATY. QazAqparat - Almatyda koronavırýs juqtyrǵan 13 adamnyń jaǵdaıy óte aýyr. Bul týraly onlaın brıfıng barysynda Almaty qalasy Qoǵamdyq densaýlyq basqarmasynyń basshysy Narıman Tabynbaev aıtty, dep habarlaıdy QazAqparat tilshisi.

Búgingi kúni Almatyda koronavırýs ınfektsııanyń 297 jaǵdaıy tirkeldi. Statsıonarlyq emdeýde 1 239 adam jatyr. Onyń 64-i – bala. Eresek 13 naýqastyń jaǵdaıy óte aýyr, 131-i aýyr, 1095-i ortasha aýyr kúıde.

Narıman Tabynbaevtyń málimetinshe, ótken táýlikte koronavırýstan 143 adam saýyǵyp shyqty.

«Qazir qala boıynsha 7011 ınfektsııalyq tósek-oryn, onyń ishinde 250 reanımatsııalyq oryn bar. Pandemııa bastalǵan ýaqytta Almatyda 500 tósek-orny bar 2 ınfektsııalyq statsıonar jumys istedi. 2020 jyldyń shilde aıynda Almatynyń 27 medıtsınalyq uıymy KVI-men aýyratyn naýqastarǵa statsıonarlyq kómek kórsetti. Sonymen qatar, Almaty qalasy Qoǵamdyq densaýlyq basqarmasynyń sheshimimen 280 tósek-orynǵa arnalǵan I.S. Jekenov atyndaǵy modýldik klınıkalyq juqpaly aýrýlar aýrýhanasy, sodan keıin 300 tósek-orynǵa Balalar qalalyq modýldik klınıkalyq juqpaly aýrýlar aýrýhanasy jáne 500 oryndy RV-90 ınfektsııalyq aýrýhanasynyń ekinshi fılıaly paıdalanýǵa berildi», - deıdi Almatynyń bas dárigeri.

Sonymen qatar, ol KVI jáne pnevmonııamen aýyrǵan patsıentterdi emdeıtin uıymdar medıtsınalyq ottegimen 100% qamtamasyz etilgenin jetkizdi.

«6 statsıonarda ottegi gazdandyrý stantsııalary salyndy, biz taǵy 12 stantsııany paıdalanýǵa berýge daıyndap jatyrmyz. Osylaısha, birinshi deńgeıli ınfektsııalyq aýrýhanalardyń jansaqtaý jáne reanımatsııa bólimshelerin ottegi jabdyqtarymen tolyq qamtamasyz etý júzege asyryldy.Konservatsııada aýyrlyǵy jeńil dárejedegi patsıentterdi emdeý úshin syıymdylyǵy 1000 patsıentke deıin qaıta jabdyqtalǵan «Halyq Arena» sport kesheni ornalasqan»,-dep qosty Narıman Tabynbaev