Almatyda koronavırýs tirkelgen joq – ákimdik
ALMATY. QazAqparat – Almatyda korovırýs juqtyrǵandar joq. Bul týraly Almaty Qoǵamdyq densaýlyq saqtaý basqarmasynyń bastyǵy Tileýhan Ábildaev baspasóz máslıhatynda aıtty, dep habarlaıdy QazAqparat tilshisi.
Almaty Qoǵamdyq densaýlyq saqtaý basqarmasynyń bastyǵy Tileýhan Ábildaevtyń aıtýynsha, jahandyq epıdemıologııalyq jaǵdaıdyń nasharlaýyna, kórshi elderde ınfektsııanyń órshýine baılanysty onyń taraý qaýpiniń aldyn alý úshin qalada kúsheıtilgen sharalar júrgizilip jatyr.
Búgingi tańda koronavırýstyń taralý jaǵdaılary álemniń 64 elinde tirkeldi.
«Almatydaǵy medıtsınalyq uıymdar koronavırýs ınfektsııasynyń ákelinýi men taralýyn boldyrmaýǵa arnalǵan epıdemııaǵa qarsy jáne profılaktıkalyq sharalardy júzege asyrýǵa tolyqtaı daıyn», - dedi Ábildaev.
Shet elden kelýshilerdiń tizimi monıtorıng ortalyǵyna túsip, aqparattar óńdelip, aty-jónderi boıynsha medıtsınalyq mekemelerge ornalastyrylady. Infektsııa kóp taraǵan elderden kelgen azamattar 14 kún boıy kópbeıindi medıtsınalyq ortalyqta oqshaýlandyrylyp, karantınde jatady.
Búgingi kúni óńirlik provızorlyq statsıonardyń 1 A sanatyna – 131 azamat, 1 V boıynsha – 119 adam, 2-kategorııa boıynsha - 955 jáne 3-kategorııa boıynsha 1632 adam baqylaýǵa alyndy.
«Medıtsınalyq uıymdar qajetti dári-dármektermen, qural-jabdyqtarmen, bakterııaǵa qarsy jáne vırýsqa qarsy preparattarmen jáne dezınfektsııalyq quraldarmen qamtamasyz etildi. Barlyq medıtsınalyq uıymdarda sanıtarlyq zararsyzdandyrǵysh, antıseptıkter ornatyldy»,- dedi Tileýhan Ábildaev.
Sondaı-aq, alǵashqy medıtsınalyq-sanıtarlyq kómek kórsetetin mekemeler, kópbeıindi aýrýhanalar men jedel járdem qyzmetkerleri úshin arnaıy oqý-jattyǵýlar ótkizildi.
Eger epıdemıologııalyq jaǵdaı nasharlasa, Almaty qalasy aýrýhanaǵa jatqyzýǵa jáne karantınge arnalǵan tósek oryndaryn qosymsha ornalastyrýǵa daıyn.
«Barlyq azamattar dárigerlerdiń baqylaýynda jáne aýrýdyń klınıkalyq belgileri joq deni saý adamdar. Olardy karantın kezinde juqpaly aýrý boıynsha dárigerler, epıdemıologtar qarap, arnaıy belgileri boıynsha respıratorlyq ınfektsııalarǵa testileýden ótkizedi. 14 kún ótkennen keıin taǵy synama alynyp, ol teris nátıje kórsetkende bul azamattar karantınnen shyǵarylady»,– dep túsindirdi basqarma basshysy.
Búigingi kúnge deıin,12 adam úıine shyqty.
Jalpy, Almatyda azamattardan COVID-2019 vırýsyn juqtyrǵan birde-bir jaǵdaı tirkelgen joq.
