Almatyda koronavırýs ınfektsııasyna baılanysty óńirlik shtab quryldy
ALMATY. QazAqparat –Almatyda qala ákimi Baqytjan Saǵyntaevtyń sheshimimen Almaty qalasy ákiminiń orynbasary Erjan Babaqumarov tóraǵalyq etetin koronavırýs ınfektsııasynyń taralýyn eskertý boıynsha óńirlik shtab quryldy, dep habarlaıdy QazAqparat tilshisi.
Shtab el Úkimetiniń sheshimderin oryndaý jáne Almatyda koronavırýs ınfektsııasyn taratýǵa jol bermeý boıynsha ulttyq jospardy júzege asyrý úshin quryldy.
Shtab QR densaýlyq saqtaý mınıstri Eljan Birtanovtyń jáne Qazaqstannyń bas sanıtarlyq dárigeri Jandarbek Bekshınniń is-qımyldy jalpy úılestirýi boıynsha jumys isteıdi.
Óńirlik shtabtyń alǵashqy otyrysy barysynda Almaty qalasynda sanıtarlyq-epıdemologııalyq jáne profılaktıkalyq sharalardy kúsheıtý máseleleri qaraldy.
Búgingi kúni qalalyq vedomstvoaralyq jospar ázirlendi. Elimizdiń turǵyny kóp megapolısiniń aýmaǵyna koronavırýs ınfektsııasynyń enýine jáne taraýyna jol bermeý maqsatynda týrıstik jáne mıgratsııalyq lek barlyq baǵytttar boıynsha baqylaýǵa alynǵan. Vırýs taraǵan elderden kelgender halyqaralyq áýejaı men temirjol vokzaldarynda mindetti túrde termometrııadan ótedi. Ol úshin teplovızorlar men portatıvti ındıkatorlar qoldanylady.
Budan bólek, Almaty qalasy betperdelermen, dárilik preparattarmen jetkilikti qamtamasyz etilgen. Medıtsınalyq zattardyń qajetti rezervi bar. Jalpy, qaladaǵy jaǵdaı turaqty jáne únemi qatań baqylaýda.
Otyrystyń qorytyndysy boıynsha qala ákiminiń orynbasary – shtab tóraǵasy Erjan Babaqumarov ótkizý pýnktterinde baqylaýdy kúsheıtý boıynsha birqatar hattamalyq tapsyrmalar berdi.
Memlekettik organdarǵa koronavırýs ınfektsııasynyń enýine jáne taraýyna jol bermeý sharalarynyń keshendi josparyn oryndaýdy jáne monıtorıng júrgizýdi qamtamasyz etý tapsyryldy. Dáriler men medıtsınalyq zattardy, onyń ishinde medıtsınalyq betperdelerdi ótkizýde baǵalyq kelisimderge jol bermeýdiń barlyq sharalaryn qabyldaý boıynsha jeke tapsyrma berildi.
Óńirlik shtabtyń otyrysy aptasyna bir ret jáne qajet bolǵan jaǵdaıda ótetin bolady.
