Almatyda koronavırýs ınfektsııasyn kóbine 20-29 aralyǵyndaǵy jastar juqtyrǵan
ALMATY. QazAqparat - Almatyda koronavırýs ınfektsııasyn eń kóp juqtyrǵan — 20-29 jas aralyǵyndaǵy jastar. Bul týraly Almaty qalasy Taýarlar men qyzmetterdiń sapasyn baqylaý departamentiniń basshysy Aızat Moldaǵasymova brıfıngte aıtty, dep habarlaıdy QazAqparat tilshisi.
Resmı derekterge sáıkes, Almatyda tirkelgen 91 jaǵdaıdyń 35-i syrttan kelgender, 48-i qatynasta bolǵandar, 5 jaǵdaı jergilikti, úsheýi jergilikti naýqaspen qarym-qatynasta bolǵandar.
«1-2 sáýir kúnderi koronavırýs boıynsha jańadan tirkelgen jaǵdaıdyń sany tómendegenin baıqap otyrmyz. Aýyrǵandardyń kópshiligi myna reıstermen kelgender: Máskeý-Almaty reısi - 33%, Ystanbul-Almaty - 25%, Berlın– Almaty –16%, Sankt-Peterbýrg reısi -13%, Mınskten kelgenderde -13%», –dedi Aızat Moldaǵasymova.
Sonymen qatar, ol koronavırýs anyqtalǵan naýqastardyń jas mólsherine toqtalyp ótti.
«Jas mólsheri boıynsha qaraıtyn bolsaq, 20-29 jas aralyǵyndaǵylar kóp. Odan keıin 30-39, 40-49 jáne 50-59 jastaǵylar shaldyqqan. Sondaı-aq, 14 jasqa deıingiler arasynda - 3 jaǵdaı, 15-19 aralyǵynda – 4 jaǵdaı tirkelgen. 60-tan asqan qaýipti toptaǵylar boıynsha - 7 jaǵdaı tirkelgen»,–deıdi departament basshysy.
