Almatyda koronavırýs ınfektsııasy taraǵan 10 oshaq anyqtaldy
ALMATY. QazAqparat – Almaty qalasy aýmaǵyndaǵy epıdemıologııalyq tekserý nátıjeleri boıynsha COVID-2019-dyń 10 oshaǵy anyqtaldy, dep habarlaıdy QazAqparat tilshisi.
Qalalyq ákimdik taratqan aqparatqa sáıkes, Almaly aýdanynda – 3, Medeý aýdanynda – 3, Túrksib aýdanynda – 2, Jetisý aýdanynda – 1, Alataý aýdanynda 1 oshaq anyqtalǵan.
Almaty qalasy boıynsha koronavırýs ınfektsııasynyń taralýyn boldyrmaý jónindegi qalalyq shtabtyń otyrysynda COVID-2019-dyń oshaǵy retinde tirkelgen aýmaqtarda ishki karantın engizý sheshimi qabyldandy.
Búginde Almatyda koronavırýs ınfektsııasyn juqtyrýdyń rastalǵan 22 jaǵdaıy tirkeldi. Barlyq oshaqta indettiń odan ári taralýynyń aldyn alý maqsatynda epıdemııaǵa qarsy jáne profılaktıkalyq is-sharalar kúsheıtildi. Medıtsına qyzmetkerleri oshaq aımaǵynda ornalasqan barlyq tulǵalardyń jaǵdaıyna monıtorıng júrgizýde.
COVID-19 indetiniń tirkelgen oqıǵalaryna jáne ınfektsııanyń taralý sıpatyna qosymsha taldaý júrgizilgennen keıin jáne epıdemıologtardyń qorytyndysyn negizge ala otyryp, oshaq aýmaǵynyń shekarasy kóppáterli úıdiń kire berisine deıin jáne turǵyn úı aýmaǵyndaǵy jekemenshiktegi úıge deıin qysqartyldy. Osyǵan oraı úıler men páterlerdi kvartal boıynsha karantındeý týraly buǵan deıin qabyldanǵan sheshim kúshin joıady.
«Jalpy ınfektsııa 1-1,5 metr qashyqta turǵan naýqas adamnyń sóıleýi, túshkirýi men jóteli arqyly beriledi. SOVID-2019 indetin adamdar otbasynda, jumysta, qoǵamdyq kólikte, qonaqta jáne basqa da qoǵamdyq oryndarda tek tyǵyz baılanysta bolý arqyly juqtyrýy múmkin. COVID-2019 vırýsynyń qorshaǵan ortada tózimdiligi tómen bolǵandyqtan, 1 saǵattan artyq ómir súre almaıdy. Sol sebepti COVID-2019 juqtyrǵan naýqaspen tyǵyz baılanys ornatpaǵan úıler men páterlerdi karantınge jabýdyń qajeti joq», - dedi ákimdikten.
