Almatyda kórnekti memleket jáne qoǵam qaıratkeri Dinmuhamed Qonaevty eske alý sharasy ótip jatyr
ALMATY. 22 tamyz. QazAqparat /Erlik Erjanuly/ - Búgin Dinmuhamed Ahmetuly Qonaevtyń dúnıeden ozǵanyna 18 jyl toldy. Osyǵan oraı almatylyqtar men qala qonaqtary marqumnyń Keńsaıdaǵy zıratyna táý etti. Sondaı-aq Almatydaǵy eskertkishine qalalyq jáne Medeý aýdandyq ákimdikteri men ardagerler keńesteri, Jambyl oblystyq ákimdigi, Halyqaralyq D.Qonaev qory, D. Qonaev atyndaǵy úlken Almaty kanaly, qala qonaqtary men D. Qonaev murajaı-úıi kórermenderi jáne qoǵamdyq uıymdar gúl shoqtaryn qoıdy.
«Dımekeńniń esimi Qazaqstan ǵana emes búkil dúnıejúzine belgili. 30 jyldaı el basqaryp respýblıkanyń damýy men órkendeýine ólsheýsiz zor úles qosty. Men ol kisiniń tikeleı qol astynda jumys jasaǵan joqpyn. Partııa mektebinde áskerı kafedranyń meńgerýshisi bop jumys istedim. D. Ahmetuly jyl saıyn kommýnıstik partııanyń jáne atqarý komıtetteri 1-hatshylarynyń kýrsyna kelgende sóz sóıleıtin», - deıdi Medeý aýdandyq ardagerler keńesiniń tóraǵasy Kım Serikbaev. Áskerı ǵylymdar doktorynyń aıtýynsha, D. Qonaevtyń ómirge kelgenine 2012 jyly 100 jyl tolady. Osyǵan oraı ardagerler «Atańa uqsańdar» degen atpen mektepterde túrli kezdesýler ótkizbek.
