Almatyda kórnekti memleket qaıratkeri Ózbekáli Jánibekov týraly dóńgelek ústel májilisi bolady
ALMATY. 22 qarasha. QazAqparat /Erlik Erjanuly/ - Almatyda 23 qarasha kúni «Ult janashyry - Ózbekáli Jánibekov» dep atalatyn dóńgelek ústel jıyny ótedi. Ony Abaı atyndaǵy Qazaq ulttyq pedagogıkalyq ýnıversıtetiniń Ahmet Baıtursynuly atyndaǵy «Tulǵataný» ortalyǵy uıymdastyryp otyr.
"Ortalyqtyń qurylǵanyna bıyl 3 toldy. Onyń maqsaty - memleketimizdiń qalyptasýyna, elimizdiń ekonomıkasy men rýhanı damýyna erekshe úles qosqan kórnekti memleket jáne qoǵam, ǵylym, mádenıet qaıratkerleriniń eńbekterin jınap, ony ǵylymı negizdeý, sondaı-aq stýdent-jastardy sol arqyly tulǵa retinde tárbıeleý jáne qalyptastyrý bolyp tabylady. Jýyrda ǵana osy ortalyqtyń uıymdastyrýymen «Táýelsiz Qazaqstan Respýblıkasynyń negizin salýshy - Prezıdent Nazarbaev» degen taqyrypta ashyq dáris ótkizilgen edi. Endi memleket jáne qoǵam qaıratkeri, tarıhshy-ǵalym, etnograf Ózbekáli Jánibekovtiń 80 jyldyǵyna baılanysty arnaıy alqaly jıyn uıymdastyrýda", - deıdi ýnıversıtettiń aqparat baspa ortalyǵynyń redaktory Álııa Asmaǵulova.
Ózbekáli Jánibekov 1931 jyly 28 tamyzda Ońtústik Qazaqstan oblysy Otyrar aýdany Saryqamys aýylynda ómirge kelip, 1998 jyly 22 aqpanda Almatyda kóz jumǵan bolatyn. Ol Qazaq halqynyń ulttyq mádenıetiniń, ana tiliniń, dástúri men ádet-ǵurpynyń jańaryp, damýyna ólsheýsiz úles qosqan birtýar tulǵa. HH ǵasyrdyń 70-jyldarynda-aq Qoja Ahmet Iasaýı kesenesiniń qalpyna keltirilýine uıytqy bolyp, Qazaqstannyń kóptegen qalalarynda etnografııalyq murajaılar ashylýyna bastamashylyq jasady. Qazaqstannyń tarıhı jáne mádenı eskertkishterin saqtaý men qalpyna keltirý maqsatyn kózdegen "Arqas" qoǵamynyń qurylýy men "Sherter", Adyrna", "Altynaı" jáne taǵy basqa da kóptegen folklorlyq óner ansamblderin uıymdastyrýǵa túrtki boldy. "Naýryz" meıramynyń, M.Dýlatov, J.Aımaýytov, M.Jumabaev, Sh.Qudaıberdıev esimderiniń halqyna qaıta oralýyna belsene atsalysty. Ana tilin damytý baǵdarlamasynyń memlekettik tujyrymdamasyn jasaýǵa qatysty. "Qazaqtyń ulttyq qol óneri" (1982), "Jańǵyryq" (1991), "Ýaqyt kerýeni" (1992), "Jolaıryqta" (1996), "Qazaq kıimi" (1996), "Ejelgi Otyrar" (1997), "Taǵdyr taǵylymy" (1996, 1997) kitaptarynyń avtory 1990 jyly tarıh ǵylymynyń kandıdaty boldy.
