Almatyda kórnekti qaıratker Vladımır Nı aqtyq saparǵa shyǵaryp salyndy
ALMATY. Qyrkúıektiń 13-i. QazAqparat /Aıgúl Turysbekova/ - Jeksenbi kúni Almatyda elimizdiń kórnekti memleket jáne qoǵam qaıratkeri Vladımır Vasılevıch Nı aqtyq saparǵa shyǵaryp salyndy. Ol 2002 jyldan bastap, sońǵy kúnine deıin «HOZÝ» korporatsııasy» jaýapkershiligi shekteýli seriktestigin basqaryp, Prezıdenttiń, el úkimetiniń jumysyn sharýashylyq turǵydan qamtamasyz etip keldi.
Qaıratkerdi aqtyq saparǵa shyǵaryp salýǵa memlekettik qurylymdardyń, qoǵamdyq uıymdar men bıznestiń, sondaı-aq koreı dıasporasynyń ókilderi keldi. Memleket basshysynyń atynan marqumnyń otbasyna jáne týǵan-týystaryna joldanǵan kóńil aıtý jedelhatyn Almaty ákimi Ahmetjan Esimov oqyp berdi.
Marqumnyń jaqyn dostary men serikteriniń atynan Ulttyq qaýipsizdik komıtetiniń tóraǵasy Nurtaı Ábiqaev sóz sóıledi.
Aqtyq saparǵa shyǵaryp salý rásimine sondaı-aq, Astana ákimi Imanǵalı Tasmaǵambetov, Qorǵanys mınıstri Ádilbek Jaqsybekov, Almaty oblysynyń ákimi Serik Úmbetov, Qaraǵandy oblysynyń ákimi Serik Ahmetov, Pavlodar oblysynyń ákimi Baqytjan Saǵyntaev, Shyǵys Qazaqstan ákimi Berdibek Saparbaev, QR Prezıdentiniń Ákimshiligi men QR Úkimetiniń ókilderi qatysty.
