Almatyda kórnekti ǵalym Qasym Asanovqa arnalǵan eskertkish taqta ashyldy

Sotsıalıstik Eńbek Eri Qasym Ábýuly Asanovqa arnalǵan memorıaldyq taqta ashyldy.

Ǵalymnyń esimin máńgi este qaldyrý maqsatynda ashylǵan eskertkish taqta onyń sońǵy jyldary turǵan úıine qoıyldy. Taqtanyń ashylý saltanatyna ǵalymnyń týǵan-týystary men shákirtteri, qala ákimdiginiń ókilderi, UǴA -nyń ǵalymdary qatysty.

"Qasym Asanov - bilim men ǵylymǵa, aýylsharýashylyq salasynyń órkendeýine aıanbaı qyzmet jasaǵan úlken azamat. Laıyqty adamǵa eskertkish taqtanyń qoıylýy - ol jastarǵa degen tárbıe. Óıtkeni, ǵalymnyń istegen isteri, artynda qaldyrǵan eńbekteri, ol ósip kele jatqan bizdiń jastarymyzǵa, qala berdi halqymyzdyń, Qazaqstannyń agrarlyq bilim-ǵylym salasynyń órkendeýine óshpes qaldyrǵan iz. Búgingi taqtanyń qoıylýyn aǵaıyn-týys úshin emes, búkil qazaq halqy úshin, búkil ǵalymdar úshin, qazaqtyń bilim men ǵylymyn syılaǵannyń nátıjesi dep aıtýǵa bolady", -dedi taqtanyń ashylý saltanatynda Reseı akademııasynyń jáne Qazaqstan Ulttyq ǵylym akademııasynyń akademıgi Raqymjan Eleshov.

Q. Asanov - mal sharýashylyǵy ǵylymdary mektebiniń negizin qalaýshy, 150-den astam ǵylymı eńbekter men mal sharýashylyǵynyń mańyzdy máselelerine arnalǵan 9 monografııanyń avtory. Ǵalym qazaq, orys, aǵylshyn tilderinde jaryq kórgen «Qazaqstandaǵy mal sharýashylyǵy» atty tuńǵysh oqýlyqtyń avtory. Ol sonymen qatar aýyl sharýashylyǵy salasynda ǵalymdardy, mamandardy daıyndaýǵa teńdessiz úles qosqan tulǵa. Uzaq jylǵy jemisti eńbegi nátıjesinde Q.Asanov «Lenın», «Qurmet belgisi», «Eńbek Qyzyl Tý», «Halyqtar dostyǵy», «Parasat» ordenderimen, medaldarmen marapattalǵan.