Almatyda kórnekti ánshi, halyq ártisi Júsipbek Elebekovke arnalǵan eskertkish ashyldy
MATY. 8 qazan. QazAqparat /Ádilet Musahaev/ - Eskertkish Almatydaǵy J. Elebekov atyndaǵy respýblıkalyq estrada-tsırk kolledji alańynda boı kóterdi.
Saltanatty shara barysynda alǵashqy bolyp sóz alǵan Almaty qalasy ákiminiń orynbasary Serik Seıdýmanov 2004 jyly ánshiniń 100 jyldyq mereıtoıyna oraı onyń eskertkish músinin Almatyda turǵyzý jónindegi QR Úkimetiniń qaýlysy qabyldanǵandyǵyn atap ótti. «J.Elebekov óziniń san qyrly talantymen otandyq mádenıetimizdiń tarıhyna ólsheýsiz úles qosqan adam. Ol tek ánshilik qyrynan kórinip qana qoımaı, dramalyq jáne operalyq keıipkerler beınesin sheber somdady», - dedi S.Seıdýmanov.
Júsipbek Elebekov uzaq shyǵarmashylyq ómir súrdi, óziniń kópqyrly jáne talantty qyzmetimen otandyq mýzyka mádenıetimizdiń tarıhyna zor úles qosqan jan.
Elebekov óneri kóńil-kúı ıirimderi, sezim baılyǵymen erekshelenedi. Mýzykalyq folklordyń talantty nasıhattaýshysy, keıingi býynǵa taratýshy boldy. Halyq kompozıtorlary Ǵ.Aıtbaev, Q.Baıjanov, Ámire Qashaýbaevtyń óleńderi Elebekovtyń repertýarynyń negizin qalaıdy.
Qazaqtyń jetekshi ánshi, sazgerleriniń shyǵarmalaryn zerttegen jýrnalshy M.Maıshekınniń aıtýy boıynsha, osy dástúrde Júsipbekten asqan ánshini estimeppin degen sózderin aıta kelip, Ámire óz dombyrasyn Júsipbek Elebekovke mura retinde usynypty.
Elebekovtyń qazaqtyń klassıkalyq ánderin dombyramen súıemeldep oryndaýy ony halyqtyń súıispenshilik yqylasyna bóledi. Sonymen qatar ol respýblıka men basqa da elderde qazaq klassıkalyq ónerin nasıhattaǵan. Ánshi 1936 jáne 1958 jyldary Máskeýde, Qytaıda (1950j., 1955j.), Mońǵolııada (1960j.), Úndistanda (1967j.) ótken qazaq óneri onkúndikterinde án saldy, qyrǵyz, túrikmen, ózbek, qaraqalpaq elderi de ony súısine tyńdady.
Elebekov óneri laıyqty dárejede óz baǵasyn aldy, Lenın jáne «Qurmet belgisi» ordenderimen marapattaldy, Qazaq KSR halyq ártisi, Qazaq KSR-y Memlekettik syılyǵynyń laýreaty qurmetti ataqtaryn ıelendi. Belgili ánshiler Mádenıet Eshekeev, Jánibek Kármenov pen Qaırat Baıbosynov ózderin Elebekovtyń shákirtterimiz dep sanaýlary da ábden oryndy.
