Almatyda kórnekti 8 aqyn-jazýshyǵa arnalǵan kórme jumysyn bastady
Kórme aqyn-jazýshylardyń mereıtoıyna oraı uıymdastyryldy.
Bıyl elde Muhtar Áýezovtiń 125 jyldyq, Ǵabıt Músirepov pen Ǵabıden Mustafınniń 120 jyldyq, Dıhan Ábilev pen Ǵalı Ormanovtyń 115 jyldyq, Ádı Sháripovtyń 110 jyldyq jáne Ázilhan Nurshaıyqov pen Safýan Shaımerdenovtiń 100 jyldyq mereıtoılary atap ótpek.
Kórmege atalǵan aqyn-jazýshylardyń ómirinen syr shertetin júzdegen zattar qoıylǵan.
Olardyń arasynda qalamgerlerdiń jeke zattary, kitaptary, nagradalary, portretteri, afıshalar, olardyń shyǵarmalaryna jazylǵan ıllıýstratsııalar bar.
«HH ǵasyrdyń 40-50 jyldarynda qazaq ádebıeti qanatyn keńge jaıyp, tereń de kemel týyndylarǵa qol jetkizdi. Bul kezeńdegi ádebıettiń damýyna qazaqtyń tuńǵysh epopeıasyn jazyp, kórkem prozany klassıkalyq deńgeıge kóterip, ádebıetke kórkemdik qýat ákelgen úzdik týyndy - «Abaı jolyn» jazǵan Muhtar Áýezovtiń qosqan úlesi zor. Sonymen qatar ulttyq prozanyń eleýli jetistikteri – qazaq ádebıetiniń altyn qoryna qosylǵan shoqtyǵy bıik týyndylar – Ǵ.Músirepovtyń «Qazaq soldaty», «Oıanǵan ólke», tarıhı romany, Ǵ.Mustafınniń soǵystan keıingi halyq ómirindegi ózgeristerdi beıneleýge arnalǵan «Mıllıoner» povesi, «Qaraǵandy» romany, D.Ábilevtiń dramatýrgııa salasyndaǵy «Qarýlas dostar», «Maıra» jáne basqa týyndylarynyń orny erekshe. Maıdanger qalamgerler – Ǵ.Ormanovtyń «Kóterme» degen atpen jarııalanǵan áńgimeler men ocherkter jınaǵy, Á.Sháripovtiń «Partızan qyzy» romany, kórkem proza janrynda súbeli eńbek etken Á.Nurshaıyqovtyń «Mahabbat, qyzyq mol jyldar», «Aqıqat pen ańyz» shyǵarmalary, sondaı-aq kitaptary oqyrman qaýym men synshylardan óz baǵasyn alǵan S.Shaımerdenovtiń «Inesh» romanyn qalyń oqyrmannyń izdep júrip oqyǵany barshaǵa málim»,- dedi QR Ortalyq mýzeıiniń ekskýrsııa uıymdastyrý jáne ekskýrsııalyq qyzmet kórsetý bóliminiń jetekshisi Bıbifatıma Baqdáýletova.
Kórme aıasynda ǵylym, mádenıet jáne óner mekemeleri mádenıetti damytý, shyǵarmashylyq bastamalardy qoldaý maqsatynda ortaq jobalar men baǵdarlamalardy júzege asyrý úshin ózara yntamaqtastyq aıasynda memorandým jasalady.
