Almatyda kórkem gımnastıkadan «Kerbez Cup» halyqaralyq chempıonaty bastaldy
ASTANA. QazAqparat - «Dostyq» sport kesheninde kórkem gımnastıkadan «Kerbez Cup» ashyq halyqaralyq chempıonat týyn jelbiretti. Baıraqty básekede 2001-2015 jyldary týǵan Qazaqstan, Reseı, Ózbekstan, Qytaı jáne Qyrǵyzstan elderinen kelgen 600 sportshy ózara myqtyny anyqtaıdy, dep habarlaıdy sport habi.
Chempıonattyń saltanatty ashylý rásimine qurmetti qonaqtar Almaty qalasy dene shynyqtyrý jáne sport basqarmasynyń basshysy Ábil Dóńbaev, «Kerbez» mektebiniń dırektory Zaıra Jakýpova jáne kórkem gımnastıkadan halyqaralyq tóreshiler qatysty. Olar barlyǵyn kóktem merekesimen quttyqtap, jarysqa qatysýshylarǵa sáttilik tiledi. Sonymen qatar, jarystyń ashylý rásiminde qatysýshylar kórermenderdi Naýryz mereksine oraı ásem bılerin usynyp, ónerlerin kórsetti.
«Barshańyzdy ulystyń uly kúni - Naýryz merekesimen quttyqtaımyn! Men kórkem gımnastıka Federatsııasy prezıdenti jáne Basqarma basshysy retinde osy sport túriniń qarqyndy damýyna atsalysatyn bolamyn. Kórkem gımnastıka qalada damyp keledi, qyzdardyń densaýlyǵyna da paıdaly. Barlyq gımnastshylarǵa sáttilik pen jarqyn jeńis tileımin», - dep bólisti Ábil Dóńbaev.
Jarystyń birinshi kúni kishkentaı búldirshinder jarys jolyna shyqty. Olardyń ónerleri kórermenderdi beıjaı qaldyrmady. Jastary kishi bolǵanymen, ádemi júris, erekshe kıim úlgisi, yrǵaqpen qozǵalýdy bılermen úılestirip, barlyǵyna keremet áser syılady.
Chempıonat uıymdastyrýshysy jáne «Kerbez» mektep dırektory Zaıra Jakýpova atap ótkendeı, bizdiń qyzdar kórkem gımnastıkadan Olımpıada chempıony Margarıta Mamýnmen jattyǵatynyna asa qýanyshty ekendigin atap ótti.
«Bizdiń chempıonatqa úsh, tórt jastaǵy kishkentaı gımnastshylardan sport sheberlerine deıin qatysyp jatyr. Chempıonattan keıin, Margarıta Mamýn jáne onyń bapkeriniń qatysýymen sheberlik sabaǵy ótedi. Mundaı shara Almatyda ótip jatqany qýantarlyq jaıt, tárbıelenýshilerimiz Olımpıada chempıonynan sabaq alyp, jattyǵýǵa múmkindik alady», - dep atap ótti Zaıra Jakýpova.
Aıta keter jaıt, jarys úsh kúnge sozylady, chempıonat nátıjeleri naýryzdyń 23-i kúni belgili bolady. Saltanattyń jabylý rásimine Margarıta Mamýn men Alııa ıÝsýpova qatysady. Jeńimpazdar men júldegerler dıplom, medal jáne baǵaly syılyqtarmen marapattalady.
