Almatyda Koreıanyń densaýlyq saqtaý salasymen áriptestik ornatýǵa arnalǵan jıyn ótti
/strong>Qyrkúıektiń 14-i. QazAqparat /Ádilet Musahaev/ - Búgin Almatyda Koreıa Densaýlyq saqtaý ındýstrııasyn damytý ınstıtýtynyń uıymdastyrýymen halyqaralyq «KOREA GLOBAL HEALTCARE» konferentsııasy ótti,
dep habarlaıdy QazAqparat.
Sharaǵa qatysýshylar densaýlyq saqtaý salasynda eki el arasyndaǵy ekijaqty áriptestiktiń damýyna Koreıa Respýblıkasynyń Prezıdenti Lı Men Baktyń Qazaqstanǵa 2009 jyldyń mamyr aıynda jasaǵan sapary túrtki bolǵandyǵyn atady.
Koreıa Densaýlyq saqtaý ındýstrııasyn damytý ınstıtýtynyń prezıdenti Kım Bop Van qazirgi tańda Koreıa memleketi densaýlyq salasy boıynsha Azııadaǵy ozyq memleketterdiń biri bolyp tabylatyndyǵyn jáne álemdegi klınıkalyq synaqtardyń eń kóbi osy elde ótkiziletindigin aıtyp ótti. «Qazirgi tańda bizdiń el em qabyldaýdyń zamanaýı tehnologııalaryn paıdalana otyryp shetelden kelgen naýqastardy qabyldaýda. Osy ýaqytqa deıin 63 myń sheteldik azamat em qabyldaý maqsatynda bizge qaralǵan. Alǵash Sıngapýr turǵyndary júginse, odan keıin AQSh, Reseı jáne japondyqtar kele bastady», deıdi Kım Bop Van.
Koreıadan kelgen mamandar naqty dıagnostıka, sertıfıkattalǵan dári-dármek, kópjyldyq tájirıbe men emdeýdiń zamanaýı tehnologııalary boıynsha em qabyldaýdyń artyqshylqtaryn aıtyp, Koreıada tıimdi baǵaǵa emdelýge bolatyndyqtaryn jetkizdi.
Sonymen qatar Koreıada medıtsınalyq qyzmettiń jalpy quny AQSh jáne Eýropa elderi usynǵan baǵadan 20-30 paıyzǵa tómen eken.
Atalmysh sharaǵa katolık ýnıversıteti janyndaǵy Áýlıe Marııa gospıtali, "Kenghı" emhanasy, "Kenbýk" ýnıversıteti janyndaǵy emhana, "Sýnchonhıan", "Inha" emhanalary men "Chaseng" Shyǵys medıtsınasy emhanasy ókilderi qatysty.
