Almatyda kópqabatty úılerge 2500 ortaq esepteý quraly ornatylady
ALMATY. QazAqparat - Almatyda úılerge jylý esepteý quraldary kimniń esebinen ornatylatyny belgili boldy, dep habarlaıdy QazAqparat tilshisi.
QR Investıtsııalar jáne damý mınıstrliginde 7-maýsymda oblystar men Astana, Almaty qalalary ákimdikteriniń esepteri tyńdalǵan bolatyn.
Jergilikti atqarý organdary kópqabatty úılerdi jylý esepteý quraldarymen qamtý, tehnıkalyq jabdyqtaý josparymen bólisti. Bul jumys aqparattyq ıntellektýaldyq júıe engizý maqsatynda jasalyp otyr.
Osy baǵytta 16 jol kartasy jasaqtalyp, pılottyq rejimde 190 úıde 16 óńirde 15 myńǵa jýyq páter ıeleri úshin ortaq jylý esepteý quraly ornatylady.
Qalalyq Energetıka jáne kommýnaldyq sharýashylyq basqarmasynyń habarlaýynsha, jol kartasy boıynsha Almaty úılerinde 2500-ge jýyq jylý quraly ornatylady.
«Jumystar bıyl tamyzdan bastap qolǵa alynady. Qarjylyq jaǵynan kelsek, qarjy lızıngine arnaıy baıqaý jarııalanady. Bul quraldardy tutynýshylar ózderi satyp alady. Ornatý da tutynýshylar esebinen. 4 jylǵa bólip tóleýge bolady. Kepildik ýaqyty 4 jyl», - dedi basqarmadan.
Búginde Almatyda úılerdiń 63% esepteý quraldary tur.
Jaqyn arada 3181 úıge 3031 qural ornatylýy tıis.
Jol kartasy halyqqa ortaq esepteý quralyn ornatýdyń tıimdiligin túsindirýge arnalǵan.
QR Mınıstrligi habarlaǵandaı, úılerde kúrdeli jóndeý júrgizgen kezde avtomatty jylý qabyldaý pýnkti ornatylsa, shyǵyndardy 60 paıyzǵa deıin azaıtýǵa bolady.
Almatyda mundaı quraldar qashan ornatylatyny áli belgisiz.
«Bul suraq talqylanýda», - dedi basqarmadan.
