Almatyda kópqabatty úıler men aýlalar aptasyna eki ret zalalsyzdandyrylady
Bul týraly Almaty qalasy Turǵyn úı saıasaty basqarma basshysynyń orynbasary Meıirjan Otynshıev onlaın– brıfıngte aıtty, dep habarlaıdy QazAqparat tilshisi.
Meıirjan Otynshıevtyń málimetinshe, Qazaqstan boıynsha eń kóp turǵyn úı qory Almaty qalasynda. Onyń quramynda 800-den astam basqarý organy qyzmet kórsetetin shamamen 8,5 myń kóppáterli úı, 23,5 myń kireberis jáne 4 myń aýla bar.
«Osy jyldyń 25 naýryzynan bastap tótenshe jaǵdaıdy qamtamasyz etý jónindegi jedel shtabtyń sheshimimen jáne Almaty qalasy Taýarlar men qyzmetter sapasy men qaýipsizdigin baqylaý departamentiniń usynysyna sáıkes mamandandyrylǵan kompanııalar turǵyn úı qoryn jappaı zalalsyzdandyrýdy bastady. Jumystyń kóleminiń úlken bolatynyn eskere otyryp barlyq aýdandarda zalalsyzdandyrý úsh kúnge bólinip, olardyń jalpy sanynyń keminde eńbek kúnine 33% qamtylady. Osylaısha kópqabatty úılerdiń kireberisteri men aýlalary kestege sáıkes aptasyna eki ret dezınfektsııalanady», - dedi ol.
Sondaı-aq, ol jumys kestesin jarııalaý boıynsha birqatar túzetý engizilgenin aıtty.
«Bul jumystar ótken aptada bastalǵan, zalalsyzdandyrýdyń birinshi kezeńiniń tájirıbesin eskere otyryp, olardy túzettik. Endi kesteler ákimdiktiń saıty men áleýmettik paraqshalarynda qoljetimdi. Sonymen qatar úıdiń kireberisterinde jáne aqparattyq taqtada ornalastyrylǵan», - dedi Meıirjan Otynshıev.
Qazirgi ýaqytta jumysqa kúnine shamamen 70 brıgada, 500-den astam adam jumyldyrylǵan.
«Óńdeýde qoldanylatyn ónimder sertıfıkattalǵan jáne adamdar men úı janýarlary úshin qaýipsiz. Olar vırýstyń qozdyrǵyshtaryna, jedel respıratorly vırýsty ınfektsııalarǵa qatysty mıkrobqa qarsy belsendikke ıe. Medıtsıalyq uıymdarda, mektepterde jáne balalar mekemelerinde bakterııalyq, vırýstyq, sańyraýqulaq etıologııasynyń, ásirese qaýipti jáne karantındik ınfektsııalardyń oshaqtarynda profılaktıkalyq, dezınfektsııalyq jumysta qoldanylady. Olar Qazaqstan Respýblıkasy jáne EAEO aýmaǵynda qoldanýǵa ruqsat etilgen», - deıdi ol.