Almatyda kópqabatty úıdiń terezesinen sekirmek bolǵan áıel qutqaryldy
ALMATY. QazAqparat – Almatyda kópqabatty úıdiń terezesinen sekirmek bolǵan áıel qutqaryldy, dep habarlaıdy QazAqparat tilshisi.
Almaty qalalyq Polıtsııa departamentiniń málimetinshe, ózine qol salmaq bolǵan áıeldi qutqarý operatsııasy Bostandyq aýdanynda ornalasqan «Keremet» turǵyn úı kesheniniń aýmaǵynda júrgizildi.
«Tańǵy saǵat 6.40-ta osy turǵyn úı kesheniniń páterleriniń birinen shý shyqqany týraly aqparat tústi. Biz atalǵan mekenjaıǵa áriptesimiz Jalǵas Bekturovpen «Býran-153» ekıpajynyń quramynda keldik. Páter syrttan jabyq boldy. Biraq ishten daýys estildi», - deıdi Almaty qalalyq Polıtsııa departamenti patrýldik polıtsııa polkiniń ınspektory Medet Musabaev.
Patrýldik polıtsııa qyzmetkerleri jergilikti turǵyndardyń kómegine júgindi.
«Tańerteńgi saǵat 7:00-de biz uıyqtap jatqanbyz. Bir áıeldiń aıǵalaǵan daýysyn estidik, ol terezeden sekirmek boldy. Polıtsııa bizdiń tereze arqyly ózine qol salmaq bolǵan áıeldi qutqaryp qaldy»,- deıdi «Keremet» turǵyn úı kesheniniń turǵyny.
Polıtsııa ınspektorynyń aıtýynsha, oqıǵa ornyna páter ıesi shaqyryldy.
«Biz qosymsha kilti bar páter ıesin shaqyrdyq. Biraq ol kisi kelgenge deıin boıjetken tórtinshi qabattaǵy páterdiń terezesinen sekirip, ózine qol jumsamaq boldy. Ol syrtaǵy kondıtsıonerdiń ústinde turdy. Sýıtsıdtiń aldyn alý úshin biz besinshi qabattan arqanmen tómen túsýge májbúr boldyq. Osylaısha sýıtsıdke jol berilmedi, - dep qorytyndylady Medet Musabaev.
Aldyn ala málimetter boıynsha, ózine qol jumsamaq bolǵan áıel mas bolǵan.
Oqıǵanyń mán-jaıy tergeý barysynda anyqtalady.
