Almatyda kópqabatty úıdiń shatyryndaǵy órtti 40 adam jabylyp sóndirdi
ALMATY. QazAqparat - Almatydaǵy Arbattyń boıynda ornalasqan kópqabatty úıdiń shatyry otqa orandy, dep habarlaıdy QazAqparat tilshisi.
«Jibek Joly kóshesi, 103 mekenjaıynda keshki saǵat 19.02 shamasynda kópqabatty úıde órt shyqqany týraly habarlama kelip tústi. Órt sóndirý bólimsheleri joǵary shaqyrý dárejesi boıynsha jiberildi. Alǵashqy kelgen bólimshe bes qabatty turǵyn úıdiń shatyry janǵanyn anyqtady. Jeldiń saldarynan órttiń taralý qaýpi týyndady»,- dep habarlady qalalyq TJD baspasóz qyzmeti.
Turǵyndardy dereý evakýatsııalaý jumysy bastalyp, bir ýaqytta órt oqpandaryn shatyrdy qorǵaýǵa engizilip, avtosaty qoıyldy.
Oqıǵa ornynda jeke quramnan 40 adam jáne 13 tehnıka jumyldyryldy.
Qabyldanǵan sharalardyń kómegimen órt 19 mınýt ishinde aýyzdyqtalyp, 19.40 kezinde tolyq sóndirildi.
