Almatyda kópqabatty úıden órt shyqty

ALMATY. QazAqparat – Almatyda kópqabatty úıdiń birinen órt shyqty, órt sóndirýshiler kóliginiń úıge jaqyn kelýine sol mańda tyǵyz qoıylǵan turǵyndar kóligi kedergi keltirdi, dep habarlaıdy QazAqparat tilshisi.

Almaty qalalyq tótenshe jaǵdaılar deparatamentiniń málimetinshe, 22 tamyz kúni keshki saǵat 21:20 kezinde «101» pýltine Tóle bı kóshesindegi 15 qabatty úıden tútin shyqqany týraly habar kelip tústi.

«Órt sóndirýshiler Almaly aýdanynyń Tóle bı kóshesindegi 273/6-úıge jiberildi. Kelgen sátte 15 qabatty turǵyn úıdiń 5-qabatynyń balkonynda órt shyqqanyn anyqtady. 2 sharshy metr aýmaqta úı zattary janǵan. Órt sóndirý tehnıkasynyń ótýine turǵyndardyń jeke kólikterin tyǵyz qoıǵany kedergi keltirdi. Ýaqytty joǵaltpaı jaǵdaıdy baǵalap, órt sóndirýshiler 5 qabatqa úsh ıindi sondaı-aq «shabýyl» órt satylaryn qoldana otyryp, joǵarǵy qabattarǵa kóterilip, órti 3 mınýt ishinde aýyzdyqtap úlgerdi. Órt tolyǵymen 21.36 mınýtta sóndirildi. Órtten eshkim zardap shekpedi»,- dep habarlady Almaty qalalyq Tótenshe jaǵdaılar departamentinen.

TJD almatylyqtardan kólikterin qoıyp shuǵyl qyzmetterdiń óter jolyn bógemeýdi suraıdy.