Almatyda kópqabatty úıden 30 bala evakýatsııalandy
ALMATY. QazAqparat - Almatyda órtengen kópqabatty úıden 50 adam, onyń ishinde 30 bala qaýipsiz aımaqqa shyǵaryldy, dep habarlaıdy QazAqparat tilshisi.
«Saǵat 12:08-de Almaty qalasynyń TJD-ine Bostandyq aýdany, Gagarın dańǵylyndaǵy «Gagarın Park» turǵyn úı kesheninde órt shyqqany týraly habarlama kelip tústi», - dep habarlady Almaty TJD resmı ókili Saltanat Baımuhambetova.
Órt sóndirýshiler oqıǵa ornyna 12:16- da kelip jetti. Gaz-tútinnen qorǵaý qyzmeti júrgizgen tekserý nátıjesinde tútinniń úıdiń jertólesinen shyǵyp jatqany anyqtaldy.
«Alaıda, jertólege kiretin temir esik jabyq boldy, ony ashtyq. Anyqtaǵanymyzdaı, jertóledegi úı zattary órtenip jatyr eken», - deıdi TJD qyzmetkerleri.
50 adam qaýipsiz aımaqqa kóshirildi, onyń 30-y - balalar. Órt aýmaǵy 10 sharshy metrdi qamtydy. Órttiń shyǵýyna dánekerleý jumystary sebep bolǵan.
