Almatyda kópqabatty úıdegi órtten keıin qansha adam aýrýhanada emdelip jatyr

ALMATY. QazAqparat - «Aqkent» yqshamaýdanyndaǵy órt saldarynan barlyǵy 49 adam zardap shekti, onyń ishinde eki eresek adam №7 qalalyq klınıkalyq aýrýhanada jatyr. 3 bala №2 balalar klınıkalyq aýrýhanasynda statsıonarlyq em alyp júr, dep habarlaıdy QazAqparat tilshisi.

«Búgingi kúngi jaǵdaı boıynsha, eki eresek adam №7 qalalyq klınıkalyq aýrýhananyń bólimshesinde jatyr, jaǵdaılary ortasha aýyr, birqalypty. Balalardyń da jaǵdaıy turaqty. Reanımatsııada jáne apparatta jatqan jaǵdaıy aýyr balalar joq»,-dedi Almaty qalasy qoǵamdyq densaýlyq saqtaý basqarmasynyń bólim basshysy Láılá Imanǵalıeva.

Vedomstvo málimetinshe, Alataý aýdany Aqkent yqshamaýdany, 54-úıde bolǵan órtke 23 jedel járdem brıgadasy jumyldyryldy, onyń ishinde 5 jansaqtaý brıgadasy boldy.

Eske salaıyq, biz buǵan deıin Almatyda 16 qabatty úıde órt tutanǵanyn habarlaǵan edik.

Qyzyl jalyn saǵat 18:46 kezinde oqshaýlanyp, sóndirildi.

Amaly qalmaǵan turǵyndar balalaryn terezeden laqtyrdy.

Zardap shekkenderdiń ishinde 2 júkti áıel bar.

Keıin Almaty qalalyq densaýlyq saqtaý basqarmasy bir adamnyń qaza tapqanyn habarlady.

Órtten zardap shekken turǵyndar tamaq jáne jatyn orynmen qamtamasyz etildi.