Almatyda kópqabatty úıdegi alapat órtten 200-ge jýyq turǵyn evakýatsııalandy
ALMATY. QazAqparat - «Altyn bulaq-2» turǵyn úı kesheniniń turǵyndaryn qutqarýǵa 35 polıtsııa qyzmetkeri qatysty, dep habarlaıdy QazAqparat.
Almaty qalalyq polıtsııa departamentiniń habarlaýynsha, Brýsılovskıı kóshesinde ornalasqan «Altyn bulaq-2» turǵyn úı kesheniniń 18 qabatty úıinen qoıý tútin shyqqany týraly habar túngi saǵat on ekiler shamasynda túsken.
JBO jedel kezekshisi órt ornyna dereý patrýldik polıtsııanyń 13 ekıpajyn jóneltti.
Sondaı-aq, órt ornyna irgeles jatqan kórshi aýdandardan da adamdar tartyldy.
«Altyn bulaq-2» turǵyn úı kesheniniń turǵyndaryn qutqarýǵa jáne órttiń saldaryn joıýǵa 35 polıtsııa qyzmetkeri qatysty.
Eń aldymen osy úıdiń 177 turǵyny evakýatsııalandy.
27 adam qutqaryldy, onyń altaýy - balalar.
«Jedel járdem» brıgadalary tútinnen ýlanǵan 2020 jáne 2021 jyly týǵan úsh sábıdi shuǵyl túrde №1 qalalyq klınıkalyq balalar aýrýhanasyna jetkizdi.
Saǵat 01:45-te órt sóndirildi. Onyń sebebin saraptama anyqtaıdy.
