Almatyda kópqabatty úı órtke orandy
ALMATY. QazAqparat - Almatydaǵy kópqabatty úı órtke oranyp, elý adam, sonyń ishinde 8 bala qaýipsiz jerge kóshirildi, dep habarlaıdy QazAqparat tilshisi.
«16 aqpan kúni 13:38-de Almaty qalalyq tótenshe jaǵdaılar departamentiniń «101» pýltine Medeý aýdany, Gogol kóshesi, 75-úıdegi páterlerdiń biriniń balkonynan órt shyqqany týraly habar keldi. Órt sóndirýshilerdiń alǵashqy legi 6 mınýttan soń, 13:44-te oqıǵa ornyna jetip bardy», - dep málimdedi Almaty TJD resmı ókili Sandýǵash Baımuhambetova.
Anyqtalǵandaı, 9 qabatty turǵyn úıdiń 2-qabatyndaǵy páterdiń balkonynda turǵan zattardan órt shyǵyp, artynsha úıdiń ishine engen. 50 adam, sonyń ishinde 8 bala evakýatsııalandy. Órt sóndirýshilerdiń shuǵyl áreketiniń nátıjesinde tilsiz jaýdyń joǵarydaǵy páterlerge taralýynyń aldy alyndy.
Jalyn sharpyǵan aýmaq - 25 sharshy metr. Órt 13:54-te aýyzdyqtalyp, 14:01-de tolyqtaı sóndirildi.
Tilsiz jaýdan eshkim zardap shekpegen.
Avtor: Danııar Dáýitálıev
