Almatyda kópqabatty turǵyn úıdegi órtte eki adam mert boldy, 20-sy qaýipsiz aýmaqqa shyǵaryldy
ASTANA. 14 qańtar. QazAqparat - Keshe saǵat 02.54-te Almaty qalasynyń Áýezov aýdanynda Taıgúl shaǵynaýdanyndaǵy toǵyz qabatty úıdiń 6-shy qabatynda ornalasqan páterde órt boldy.
Bul týraly QR TJM-niń baspasóz qyzmetinen habarlandy.
Jalyn saǵat 04.14-te sóndirildi. Tilsiz jaýdy aýyzdyqtaýǵa QR TJM Almaty qalasy boıynsha TJD órtke qarsy qyzmetiniń 13 adamy men 4 tehnıkasy jumyldyryldy. Jalyn sharpyǵan aýmaq 40 sharshy metrdi qurady. 20 adam, sonyń ishinde 5 bala qaýipsiz aımaqqa kóshirildi. Órt ornynda eki adamnyń máıiti (jeke tulǵalary anyqtalmaǵan) tabyldy.
