Almatyda kópqabatty páterlerdiń qabyrǵasynda esirtki zattaryn jarnamalaıtyn jazbalar paıda boldy
ASTANA. QazAqparat - Almatyda kóppáterli turǵyn úıdiń qabyrǵasyna sıntetıkalyq esirtki zattaryn jarnamalaıtyn jazba qaldyrǵan adamdar izdestirilýde.
Bul jaıynda QR ІІM Memlekettik til jáne aqparat departamentiniń dırektory Almas Sadýbaev málim etti, dep habarlaıdy QazAqparat.
«Facebook» qoldanýshylardyń biriniń shaǵymyn tekserý barysynda Almaty qalasyndaǵy shaǵynaýdandardyń birindegi kópqabatty turǵyn úıdiń qabyrǵasynan sıntetıkalyq esirtki zatyn taratatyn ınternet-resýrsynyń adresi kórsetilgen jarnamalyq jazý anyqtaldy. Qazirgi ýaqytta atalǵan jazýdy jazǵan tulǵany, sonymen birge ınternet-resýrstyń jumysyn anyqtaý boıynsha tıisti sharalar júrgizilýde. Atalǵan ınternet-resýrsqa kirý buǵattaldy. Azamattardan esirtki zattary men psıhotroptyń zattardy satý týraly osyndaı qabyrǵaǵa jazylǵan jarnamalardy kórgen jaǵdaıda olardy sýretke túsirip, ornalasqan jerin kórsetý arqyly polıtsııaǵa júginýdi ótinemiz», - dedi Almas Sadýbaev.
Aıta keteıik, Olga Arapova esimdi áleýmettik jeli paıdalanýshy óziniń Feısbýktegi paraqshasynda sońǵy aılardyń ishinde Almatydaǵy kóppáterli úılerdiń qabyrǵasynda sıntetıkalyq esirtki satýmen aınalysatyn ınternet-resýstardyń adresi kórsetilgen jarnamalyq jazýlardyń kóbeıip ketkendigi jaıynda dabyl kótergen edi.
Este bolsa , buǵan deıin Almas Sadýbaev Qazaqstanda esirtkiniń zańsyz aınalymyna qatysy bar 84 ınternet-resýrs anyqtalǵanyn málim etken bolatyn.
