Almatyda kópirden sekirmek bolǵan er adam qutqaryldy
ALMATY. QazAqparat - Almaty polıtsııasy er adamnyń estakadanyń shatyryna ne sebepti shyqqanyn anyqtady, dep habarlaıdy QazAqparat tilshisi.
Oqıǵa áleýmettik jelilerdi baqylaý barysynda anyqtaldy. Belgisiz er adam joldyń ústindegi kópirdiń tóbesine shyǵyp, ary – beri júrgen.
«Belgili bolǵandaı, bul oqıǵa № 6 yqshamaýdanydaǵy Saın kóshesiniń boıynda bolǵan. Saǵat 18:20-da polıtsııaǵa er adamnyń kópirden sekirmek bolǵany týraly habar kelip tústi. Polıtsııa qyzmetkerleri jetkenge deıin, 1982 jyly týǵan Z. esimdi azamatty kýágerler kópirden túsirip alǵan. Er adam oqıǵa ornyna kelgen «Býran-86» patrýldik jasaǵyna tapsyryldy»,– dep habarlady Almaty qalalyq Polıtsııa departamentiniń baspasóz qyzmeti.
Er adam óziniń is-áreketin polıtsııa qyzmetkerlerine, jumystan qaıtyp kele jatqanda telefon arqyly otbasynda qaıǵyly jaǵdaı bolǵany týraly habardy estigenin aıtqan. Oǵan polıtsııa jáne jedel járdem qyzmetkerlerimen birge psıhologııalyq kómek kórsetildi. Qazir ol dárigerlerdiń baqylaýynda.
