Almatyda kópir ústinde qaýipti trıýk jasaǵan adam polıtsııaǵa jetkizildi
ALMATY. QazAqparat – Almatyda Saın kóshesi boıyndaǵy kópirde qaýipti trıýk jasaǵan ekstremal polıtsııa bólimine jetkizildi, dep habarlaıdy QazAqparat tilshisi.
Ekstremaldy taspaǵa túsirip alǵan kýágerler beınejazbany áleýmettik jelige júktegen. Vıdeodan er adam kópirdiń ústinde aıaǵyn kóterip, qolmen júrip bara jatqanyn kórýge bolady.
Polıtsııa departamentiniń baspasóz qyzmeti málim etkendeı, adamdar 102 pýltine kópirdiń ústinde júrgen adam týraly habar bergen. Patrýldik polıtsııa ekıpajy ony tergeý úshin Áýezov aýdandyq polıtsııa basqarmasyna jetkizdi.
«Belgili bolǵandaı, 25 jastaǵy A. esimdi azamat, óziniń kásibı akrobatıkamen aınalysatynyn aıtqan. Osy kezde dosy ony dronmen vıdeoǵa túsirip júrgen. Olar bir beınerolık daıyndap júrgen. Qazirgi ýaqytta onyń áreketteri QR Ákimshilik quqyq buzýshylyq týraly zańnyń 434-baby boıynsha jikteldi. Ol usaq buzaqylyq úshin jaýapqa tartylady», - dep habarlady polıtsııadan.
