Almatyda kópbalaly otbasynan 140 adam jumysqa ornalasty
6 balanyń ákesi, ІІІ top múgedegi Aıbek Qanapııanovty qalalyq Jumyspen qamtý ortalyǵynyń mamandary Sunrise Group uıymyna jumysqa ornalastyrǵan.
«Bizdiń uıym kórý qabileti nashar adamdardy qoldaýmen aınalysady. Men áleýmettik jumysker retinde dárimen qamtý jaǵynan, eńbek etýge jasalǵan jaǵdaı jaǵynan múmkindigi shekteýli azamattardyń jaǵdaıyn kúndelikti baqylap otyramyn. Olardyń barlyq talap-tilekterin basshylyqqa jetkizemin. Jumysym aýyr emes, biraq saýaby mol», - dedi Aıbek Qanapııanov.
5 balanyń anasy, І top múgedegi Ásel Jahına «Aqnıet úmiti» qoǵamdyq uıymyna músinshi bolyp jumysqa turǵan. Oǵan da bos jumys ornyn qalalyq ákimdik taýyp bergen.
«Bizdiń tsehta barlyq buıymdar múmkindigi shekteýli azamattardyń qolymen jasalady. Sheberler gıpspen, balshyqpen, metalmen, mármármen jumys isteıdi. Bárimiz resmı túrde jumysqa turǵanbyz. Zeınetaqy tólemderi, áleýmettik tólemder aýdarylyp otyr. Bul jumystar múmkindigi shekteýli azamattardyń áleýmettik turǵydan beıimdelýine septigin tıgizedi», - dedi ol.
Aıta ketý kerek, áleýmettik turǵydan az qamtylǵan otbasylarda tárbıelengen túlekter jastar tájirıbesi baǵdarlamasyna qatysa alady. Kolledj túlegi Ardaq Serik United Citizenz Found qoryna aýdarmashy bolyp ornalasty.
«Aýdarma men kitap baspasynan bólek, biz kópbalaly, turmysy tómen otbasylardyń balalaryna shet tilin oqytyp jatyrmyz. Jastar tájirıbesi - men úshin úlken ómirge basylǵan alǵashqy qadam bolmaq», - deıdi Ardaq Serik.
Aıta ketý kerek, munyń aldynda kópbalaly otbasylardy qoldaýǵa baǵyttalǵan «Baqytty otbasy» keshendi baǵdarlamasy jasalǵan bolatyn. Oǵan arzan ıpoteka, mektep oqýshylary men stýdentterge shákirtaqy, tegin balabaqsha, jumyspen qamtý sııaqty birneshe baǵyt kiredi.
Jumyspen qamtý boıynsha alańdatqan suraqtar bolsa, +7 (727) 224 20 00; +7 (727) 221 66 11 nómirlerine habarlasýǵa bolady.
