Almatyda kópbalaly analardyń aqshasyn qoldy etken áıel ustaldy
ALMATY. QazAqparat - Almatyda kópbalaly analardy aldap, aqshasyn qoldy etken áıel ustaldy, dep habarlaıdy QazAqparat tilshisi.
Qalalyq polıtsııa departamentiniń habarlaýynsha, 35 jastaǵy áıeldiń moınynda 100-ge jýyq qylmystyq epızod tirkelgen.
Onyń quıtyrqy áreketterinen Shymkent, Taraz, Qyzylorda, Almatynyń kópbalaly analary japa shekti.
«Bul áıel kópbalaly analardy ataýly áleýmettik kómek rásimdep beremin, qujattardy tezdetip beremin dep, senimine kirgen. Ol isti sheshý úshin kerek dep aldyn ala tólem alyp otyrǵan. Bul oqıǵa analarǵa úlgi bolyp otyr. Memlekettik qujattardy rásimdeýde eshqandaı «kómekshiniń» kómegi kerek joq. Bul azamatshanyń memlekettik organdarmen eshqandaı baılanysy bolmaǵan», - dedi Áýezov aýdandyq polıtsııa basqarmasynyń basshysy Álisher Tursynbetov.
Kúdiktiniń kámelettik jasqa tolmaǵan eki balasy bar kórinedi. Balalary anasynyń qolynda tárbıelenip jatyr.
Buǵan deıin de alaıaq kelinshek osyndaı qylmystyq isi úshin jaýapkershilikke tartylǵan.
"Qazir ol ýaqytsha oqshaýlaý ornynda qamaýda otyr. Oǵan qatysty QR QK 190-baby boıynsha qylmystyq is qozǵaldy. Osy azamatshanyń áreketinen japa shekken azamattar bolsa 8-727-298-53-02; 8-707-515-47-35; 8-701-718-70-69 nemese 102 nómirlerine habarlasýyn suraımyz», - dedi polkovnık Tursynbetov.
