Almatyda kóp salaly aýrýhana ashyldy
ALMATY. 16 qyrkúıek. QazAqparat /Ádilet Musahaev/ - Búgin Almaty qalasynyń ákimi Ahmetjan Esimov jańadan ashylǵan 300 kereýetti kóp salaly aýrýhanada boldy.
Qala ákimi medıtsına tulǵalarymen tildese kele, mundaı aýrýhana Almatyda jalǵyz ekendigin jetkizdi. «Bul jerde respýblıkanyń ózge jerinde joq eń sońǵy úlgidegi jabdyqtar bar. Endigi basty másele buny tıimdi paıdalaný. Naýqastardyń kásibı medıtsınalyq kómek alý úshin arnaıy daıyndalǵan mamandar kerek. Sońǵy eki jylda qalada 8 densaýlyq saqtaý mekemesi boı kóterdi, onyń ishinde sırek kezdesetini osy aýrýhana»,-dep atap ótti Ahmetjan Esimov.
Qazirgi ýaqytta atalǵan mekemege jańa jabdyqtar ornatylyp, mamandardy oǵan ázirleý jumystary júrgizilýde.
Aýrýhananyń qurylys jobasy 10 mıllıard 941 mıllıon teńgeni quraǵan. Sonymen qatar 3,4 mıllıard teńge medıtsınalyq jabdyqtar alynǵan.
