Almatyda kóp balaly analardy marapattaý rásimi jalǵasýda
ALMATY. 8 qarasha. QazAqparat /Erbol Turymbetov/ - Medeý aýdany ákiminiń orynbasary Berik Mustafın kópbalaly 5 anaǵa «Altyn alqa» jáne «Kúmis alqa» marapatyn tabys etti.
B.Mustafın ardaqty analardy quttyqtaı otyryp, bul qoshemet memlekettiń áıel-analarǵa árdaıym kóńil bólip otyratyndyǵynyń aıǵaǵy ekendigin atap ótti. «Kóp balaly analar eńbegi memleketimizdiń damýy úshin úlken mańyzǵa ıe. Sebebi, bizdiń memlekettiń eń basty baılyǵy - onyń halqy», dedi «Altyn alqa» ıegeri Baljan Aıdarova.
B. Aıdarova óziniń ǵalym-túrkitanýshy otaǵasymen birge otbasynda 7 bala tárbıelep ósirdi. Olar qazir elimizdiń dıplomatııa, jýrnalıstıka, bıznes jáne memlekettik basqarý oryndarynda qyzmet etedi.
Osyndaı quttyqtaý aktsııalary qalanyń barlyq aýdandarynda ótýde.
Esterińizde bolsa, 2010 jyldan beri kóp balaly analar burynǵydaı 10 emes, 7 bala dúnıege ákelgenderden bastalatyn bolyp edi. Al 6 balanyń analary «Kúmis alqanyń» ıegeri atanady. Bul sheshim týraly Qazaqstan áıelderiniń V forýmynda jarııalandy. Jalpy kóp balaly analardy marapattaý rásimi 1993 jyldan beri ótip keledi.
