Almatyda qońyraý shalyp, eldi dúrliktirgen azamat ustaldy
ALMATY. Qyrkúıektiń 22-si. QazAqparat /Ádilet Musahaev/ - Almaty polıtseıleri bir saǵat buryn telefon shalyp, turǵyndardy dúrliktirgen adamdy ustady,
dep habarlaıdy QazAqparat Almaty qalasy ІІD-niń baspasóz qyzmetine silteme jasap.
Keshki saǵat bester shamasynda jedel basqarmaǵa Túrkisib aýdanyndaǵy №67 úıdiń bir páterinde jarylǵysh zat bar degen aqparat kelip túsken. «102» operatoryna qońyraý shalýshy óz aty-jónin aıtýdan bas tartyp, aqparattyń ras ekendigin jetkizgen.
Polıtseıler syrtqy ekıpaj qyzmetkerlerin, jol polıtseıleri jáne ýchastkelik ınspektorlardy jumyldyra otyryp, atalmysh úıdiń turǵyndaryn qaýipsiz jerge kóshire bastaıdy. Al krımınaldy polıtsııa bóliminiń qyzmetkerleri qońyraý shalýshynyń meken-jaıyn anyqtap, ony ustaýǵa kirisedi.
«Qońyraý shalýshy úreılengen kórshilerimen birge aýlaǵa shyǵyp, jedel qyzmetkerlerdiń jumysyn baqylaǵan osy úıdiń 50 jasar turǵyny bolyp shyqty. Úıdi jiti tekserý jumysyna TJ qyzmetkerleri men ıtpen qutqarý mamandary qatysty», deıdi Túrkisib aýdandyq ІІB-nyń bastyǵy polıtsııa polkovnıgi Nurlan Moshqalov.
Abyroı bolǵanda aqparat jalǵan bolyp, qońyraý shalyp eldi dúrliktirip júrgen turǵyn ustaldy. Bala kezinen qalalyq júıke aýrýlary dıspanserinde tirkeýde turǵan Nıkolaıdyń naýqas ekeni birden bilingen. Erkek ǵaryshtan kórshiniń páterinde jarylǵysh zat bar degen belgi kelgennen keıin qońyraý shalýǵa kiriskendigin aıtady. Degenmen mundaı elestiń sońy shuǵyl qyzmet pen polıtseılerdiń altyn ýaqytyn ketirip, memleket qazynasyna shyǵyn ákeldi.
