Almatyda «Konstıtýtsııa - Qazaqstannyń turaqtylyǵy men órkendeýiniń negizi» atty kórme ashyldy
Osy shara barysynda Qazaqstanǵa belgili zańger, akademık, zań ǵylymdarynyń doktory, Ata zańnyń qabyldanýyna orasan zor úles qosqan ǵalym Sultan Sartaev kitaphana oqyrmandarymen kezdesip, Ata zańnyń mańyzdylyǵy týraly áńgime órbitti.
«Qazaq halqynda ejelden úlkendi syılaý mádenıeti bar. Ásirese, ataǵa degen qurmet erekshe. Sondyqtan da qazaq halqy óziniń basty zańyn - Ata zań dep bekerge atamaǵan. Biz sol Ata zańymyzdyń árbir babyn, tarmaǵyn, núktesine deıin saqtaýymyz qajet. Áıtpese, konstıtýtsııalyq aýmaqtan shyǵyp ketken bolamyz. Biz ata-babalarymyzdyń óristi isin alǵa jyljytýymyz úshin osy negizgi zańnyń aıasynda ómir súrýimiz kerek. Sonda ǵana óristi elderdiń qataryna qosylamyz. Prezıdentimiz Nursultan Nazarbaevtyń ózi Konstıtýtsııany saqtaý boıynsha eldiń sımvolyna aınalyp otyr. Sondyqtan jastarǵa aıtarym, Ata zańnyń saqtalýyna kúsh salyńyzdar», - dedi S. Sartaev.
Qazaqstannyń Konstıtýtsııasy kúnine arnalǵan kórmege QR Ulttyq kitaphanasy qorynan 100-ge jýyq basylym qoıyldy. Olardyń ishinde Táýke han tusynda qabyldanǵan «Jeti jarǵy», qazaq halqynyń dástúrli ádep-ǵuryp zańdarynyń jınaǵy; memleket tarıhy men quqyǵy týraly ádebıetter, «Mádenı mura» memlekettik baǵdarlamasy aıasynda jarııalanǵan «Qazaqtyń ata zańdary» qujattar men materıaldardyń jınaǵy jáne Sultan Sartaevtyń eńbekteri bar. Sonymen qatar, qazaq, orys, aǵylshyn, ózbek, uıǵyr jáne taǵy basqa tilderde basylǵan Qazaqstan Respýblıkasynyń Konstıtýtsııasy da qoıylǵan.
Búgingi sharaǵa belgili qoǵam qaıratkerleri, doktoranttar, magıstranttar, joǵary oqý oryndarynyń stýdentteri jáne Ulttyq kitaphananyń oqyrmandary qatysty.