Almatyda Konstıtýtsııa avtorlarynyń biri, QR UǴA akademıgi Ǵaırat Saparǵalıev dúnıeden ozdy
ALMATY. Shildeniń 20-sy. QazAqparat /Elena Ilınskaıa/ - Táýelsiz Qazaqstannyń Konstıtýtsııa kúnin toılaýǵa bir aı ǵana ýaqyt jetpeı, búgin Almaty qalasynda onyń avtorlarynyń biri, QR UǴA akademıgi Ǵaırat Saparǵalıev kenetten qaıtys boldy.
Ǵaırat Saparǵalıuly táýelsiz Qazaqstannyń zań ǵylymynyń qalyptasýyna, Ata Zańymyzdyń jasalýyna belsene úles qosqan aıtýly tulǵalardyń biri. Onymen qatar onyń qalamynan zań ǵylymy salasyna qatysty birneshe oqýlyqtar men zertteý eńbekteri jaryq kórgen. Ǵaırat Saparǵalıuly Qazaqstannyń zań ǵylymy salasyndaǵy eń jarqyn, kórnekti tulǵalardyń biri edi.
Ǵaırat Saparǵalıev 1930 jylǵy maýsymnyń 26-synda Semeı oblysynyń Jańasemeı qalasynda dúnıege kelgen. Saratov zań ınstıtýtynyń túlegi. 36 jasynda doktorlyq qorǵaǵan KSRO-niń eń jas ǵylym doktorlarynyń biri. QR UǴA aspıranty, kishi ǵylymı qyzmetkeri, aǵa ǵylymı qyzmetker, dırektordyń orynbasary, QR UǴA fılosofııa jáne quqyq ınstıtýtynyń bólim bastyǵy, Abaı atyndaǵy AlMÝ-dyń zań fakýltetiniń dekany, Qazaq gýmanıtarlyq zań ýnıversıtetiniń Memleket jáne quqyq ınstıtýtynyń dırektory qyzmetterin atqarǵan. Onyń 370-ten astam ǵylymı eńbegi bar. Olardyń qatarynda táýelsiz Qazaqstannyń zań ǵylymyna eleýli úles qosqan «Qazaqstan Respýblıkasyndaǵy konstıtýtsııalyq qurylymnyń qalyptasýy», «Konstıtýtsııalyq jaýapkershiliktiń problemalary», «Táýelsiz Qazaqstanda memlekettik qyzmetti reformalaýdyń quqyqtyq problemalary» syndy eńbekteri bar. Qazaqstannyń eńbek sińirgen zań qyzmetkeri, «Qurmet» ordeniniń, birqatar medaldardyń ıegeri.
Marqummen qoshtasý rásimi QazUÝ rektoratynyń ortalyq hollynda shildeniń 22-inde ótedi.
